Զինյալները հյուրանոցից առևանգել են Լիբիայի վարչապետին
Բրիտանական Reuters լրատվական գործակալության փոխանցմամբ՝ զինված անձանց խումբն առևանգել է Լիբիայի վարչապետ Ալի Զեյդանին: Այս մասին հայտնել են արաբական արբանյակային հեռուստաալիքները: Լիբիայի կառավարության պաշտոնական ներկայացուցիչները հաստատել են վարչապետի առևանգման փաստը՝ չհայտնելով տեղի ունեցածի մանրամասները:
Sky News Arabia և Al Arabiya հեռուստաալիքների տվյալներով՝ զինյալների խումբը վարչապետին առևանգել է Տրիպոլիի հյուրանոցներից մեկից և տարել է անհայտ ուղղությամբ: Հյուրանոցի աշխատակիցը հայտնել է, որ վարչապետի առևանգումն իրականացվել է առանց մեկ կրակոցի: Զինյալներն իրենց հարգալից են պահել և չեն պատճառել տհաճություններ:
Ալի Զեյդանը Լիբիայի վարչապետի պաշտոնը զբաղեցնում է 2012 թվականի հոկտեմբերից:
