Հակոբյանը՝ Նալբանդյանին. Քաղաքական կլո՞ւբն է որոշում կայացնում համապետական հարցերի վերաբերյալ
«Համապետական հարցը լուծվում է մեկ-երկու-երեք պաշտոնյաների սենյակում՝ անտեսելով ժողովրդի, պառլամենտի դիվանագիտությունը»,- քիչ առաջ ԱԺ-ում կառավարության հետ հարցուպատասխանի ժամանակ՝ դիմելով Արտաքին գործերի նախարար Էդվարդ Նալբանդյանին, հայտարարեց «Ժառանգություն» խմբակցության ղեկավար Ռուբեն Հակոբյանը:
«Փորձում ես ինչ-որ բան իմանալ, բայց միակ վերջնական պատասխանն այն է, որ իշխանական մեծամասնության հետ Մաքսային միության հարցը քննարկվել է: Հնարավո՞ր է, որ ամբողջ քաղաքական ինտելեկտն այդ սենյակներում հավաքված լինի: Հնարավոր է, բայց կա նաև ընդդիմություն»,- ընդգծեց նա: Ռուբեն Հակոբյանը Նալբանդյանից հետաքրքրվեց, թե ե՞րբ է հրապարկվելու ԵՄ ասոցացման համաձայնագրի և Մաքսային միության անդամակցության բովանդակությունը:
Ի պատասխան ԱԳ նախարարն ասաց, թե Սահմանդրության 55-րդ հոդվածի համաձայն, նախագահը ստորագրում է միջազգային պայմանագրեր և անհարժեշտության դեպքում ներկայացնում է ԱԺ վավերացմանը: Էդվարդ Նալբանդյանը շեշտեց, որ միջազգային պայմանագրերը չեն հրապարակվում նախաստորագրումից առաջ: Դրանք, նրա խոսքով՝ հրապարակվում են ստորագրումից հետո միայն, թեև լինում են բացառություններ.
«Բրյուսելում էլ ասվեց, որ կարգն այդպես է: Ուզում եմ հիշեցնել, որ կա կարգ: Գաղտնիք չկա այդ պայմանագրերի մեջ»:
Ինչ վերաբերում է Մաքսային միությանը, նա նշեց, թե բացի այն հռչակագրից, որը հրապարակվեց Սերժ Սարգսյանի մոսկովյան այցի ժամանակ, որը արտահայտում է որոշման մտադրությունը, այլ փաստաթուղթ չկա: Էդվարդ նալբանդյանը նշեց, որ Մաքսային միության շուրջ բանակցությունները կարող են սկսել, երբ անդամ-պետությունները տան իրենց համաձայնությունը, որից հետո նոր կլինեն փաստաթղթեր:
«Խոսքը նաև մի շարք փաստաթղթերի մասին է, ոչ միայն ձեր մատնանշած: Եթե ԱԺ-ն գտնի, որ փաստաթղթերը արժանի չեն վավերացման… համապատասխան եզրակացություններն արեք ինքներդ՝ սա է հարցը»:
Ռուբեն Հակոբյանին էլ ավելի զայրացրեց այս պատասխանը. «Չէի սպասում, թե կգաք՝ կբացատրեք ինձ Սահմանադրության 55-րդ հոդվածը: Իմ հարցն ավելի լուրջ էր՝ ես խոսում եմ պառլամենտական դիվանագիտությունը զրո դարձնելու մասին: Քաղաքական կլո՞ւբն է որոշում կայացնում, սա է իմ ասածը: Ինձ միջազգային նորմերի մասին մի ասեք, ես գիտեմ, որ պայմանավորվում են երկու կողմերը: Բայց գիտեմ նաև Ուկրաինայի օրինակը, ով խնդրեց թույլ տալ իրենց փաստաթուղթը նախաստորագրումից առաջ հրապարակել: Ձեր ասածը այստեղ նստած բոլորը գիտեն: կան համապետական հարցեր և միջազգային պռատակոլը իմանալով, պետք է ներկայացնենք հանրությանը: Մենք իրավունք չունենք այս պատմական պատասխանատու պահին փակվենք ու երեք-չորս հոգով որոշեք, հետո Սահմնադրության հոդվածները դեմ տանք»:
Է. Նալբանդյանն էլ պարզաբանեց՝ նշելով, թե Ուկրաինայի օրինակը տեղին չէ մեջբերել, քանի որ փաստաթուղթը հրապարկվել է նախաստորգարումից հետո: Նա շեշտեց, թե ՀՀ-ն թափացիկ քաղաքականություն է վարում:
