Ռուսաստանի ԱԳՆ-ը խստապես դատապարտել է Սիրիայի քրդերի հանդեպ իսլամիստների գործողությունները
Ռուսաստանի ԱԳՆ-ի պաշտոնական կայքի փոխանցմամբ՝ Ռուսաստանի ԱԳՆ-ը խստապես դատապարտել է Սիրիայում իսլամիստների գործողությունները: Ռուսական կողմի տվյալներով՝ ներկայումս իսլամիստների մոտ է պահվում մոտ 200 խաղաղ բնակիչ: ՌԴ ԱԳՆ-ը դատապարտել է իսլամիստների կողմից խաղաղ բնակիչների նկատմամբ անմարդկային ու ծաղրական վերաբերմունքի ցուցաբերումը:
Նշվում է, որ քրդերի և «Ալ-Քաիդայի» հետ կապված իսլամիստների միջև մի շարք խոշոր բախումներ են գրանցվել Սիրիայի հյուսիսում: Քրդեին հաջողվել է հետ մղել իսլամիստներին և անգամ գերեվարել նրանց հրամանատարներից մեկին՝ Աբու Մուսաաբին:
Ի պատասխան՝ իսլամիստները պատանդ են վերցրել մոտ 500 քրդի, հիմնականում կանանց, երեխաներին, ծերերին՝ պահանջելով ազատ արձակել իրենց գլխավորին: Դրանից հետո նրանք սկսել են մեկը մյուսի հետևից կտրել պատանդների գլուխները, ինչից հետո քրդերը հարկադրված են եղել բաց թողնել Աբու Մուսաաբին՝ իրենց պատանդների ազատ արձակման դիմաց:
Իսլամիստները սակայն դեռ իրենց մոտ են պահում մոտ 200 խաղաղ բնակչի՝ նրանց օգտագործելով որպես «կենդանի վահան»:
