ԵԱՀԿ Մինսկի խմբի համանախագահներն այսօր կհանդիպեն Իլհամ Ալիևի հետ
Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի համանախագահներ Ժակ Ֆորը (Ֆրանսիա), Իգոր Պոպովը (Ռուսաստան) և Յան Կելին (ԱՄՆ) գտնվում են Ադրբեջանում: Այսօր նրանք հանդիպելու են Ադրբեջանի նախագահ Իլհամ Ալիևի հետ, ինչից հետո մեկնելու են Երևան, ուր և հանդիպելու են Հայաստանի նախագահ Սերժ Սարգսյանի հետ:
Երկու նախագահների հետ իրենց հանդիպումներում համանախագահները քննարկելու են Կրակովում Հայաստանի ու Ադրբեջանի արտգործնախարարների միջև տեղի ունեցած հանդիպման արդյունքները, ինչպես նաև նախագահներին առաջարկելու են հունիսին անցկացնել իրենց հերթական հանդիպումը՝ կապված Ղարաբաղյան հակամարտության կարգավորման հետ:
