ՕԵԿ-ն ու ՀՅԴ-ն սեփական սոցհարցումներն ունեն
«Հայկական սոցիոլոգիական ասոցիացիան» այսօր հրապարակել է Երևանու ավագանու ընտրություններին մասնակցող ուժերի վարկանիշների վերաբերյալ սոցհարցման արդյունքներ, ըստ որի, «Հայ ազգային կոնգրես», «Հայ հեղափոխական դաշնակցություն», «Օրինաց երկիր» կուսակցությունները չեն կարող հաղթահարել անցողիկ շեմը:
«Հայկական սոցիոլոգիական ասոցիացիայի» ղեկավար Գևորգ Պողոսյանի հրապարակած սոցիոլոգիական հարցման տվյալներով՝ ՀԱԿԿ-ն ստացել է 4.4 տոկոս, ՕԵԿ-ը` 4.2, ՀՅԴ-ն` 2.2:
Հարցման արդյունքներով՝ առաջատարը Հայաստանի հանրապետական կուսակցությունն է` 48.3 տոկոսով, երկրորդ հորիզոնականում՝ «Բարգավաճ Հայաստան» կուսակցությունն է՝ 16.1 տոկոսով, այնուհետև՝ «Բարև, Երևան» դաշինքն է, որն, ըստ Գ. Պողոսյանի՝ կկարողա հաղթահարել անցողիկ շեմը` 8.4 տոկոս քվե ունենալով:
168.am-ի հետ զրույցում ԱԺ ՕԵԿ խմբակցության ղեկավար Հեղինե Բիշարյանն այսպես արձագանքեց «Հայկական սոցիոլոգիական ասոցիացիայի» սոցհարցման արդյունքներին.
«Եթե նախընտրական շրջանում տուրք տանք այդ հայտարարություններին, այդ հարցումներին, դա կնշանակեր, որ քարոզարշավն ընդհանրապես պետք է դադարեցնել և ընկել նման որոշումների խելքին: Մեզ վրա ոչինչ չի ազդում, մեր քարոզարշավը նույն ակտիվությամբ անում ենք: Բոլոր բակերում, դահլիճներում մենք ունենք համապատասխան կուսակցականներ, համակիրներ, որոնք գալիս են և որոշումներ են կայացնում»:
Հեղինե Բիշարյանը նաև կասկած հայտնեց, թե հայտնի չէ` այդ սոցհարցումն ի՞նչ մեթոդաբանություն է օգտագործել և որքանո՞վ է հավաստի: Միաժամանակ նա նշեց, թե իրենք ունեն իրենց ներքին հարցումը:
«Ես չգիտեմ, թե իրենք ինչ ճշգրտության շրջանակներում են նայում, բայց ես ամեն դեպքում համոզված եմ, որ մենք ոչ միայն հաղթահարելու ենք, այլև ավելին ենք հավաքելու»,- նշեց ՕԵԿ փոխնախագահը:
ՀՅԴ համամասնական ցուցակում երրորդ հորիզոնականը զբաղեցնող ՀՅԴ ԳՄ փոխներկայացուցիչ Արսեն Համբարձումյանը ևս վստահեցրեց, որ իրենց ներքին հարցումները բոլորովին այլ պատկեր են արտացոլում:
«Մենք անլուրջ գործերին լուրջ չենք վերաբերվում»,- 168.am-ի հետ զրույցում ասաց Արսեն Համբարձումյանը՝ արձագանքելով սոցիոլոգ Գևորգ Պողոսյանի հրապարակած հարցումների արդյունքներին:
Մեր այն հարցին, թե սա պատվիրվա՞ծ սոցհարցում եք համարում, Արսեն Համբարձումյանը պատասխանեց. «Այլ գնահատական չեմ կարող տալ, որովհետև մենք ունենք մեր հարցումները, որոնք բոլորովին այլ պատկեր են նկարագրում»:
Մեզ չհաջողվեց ՀԱԿԿ-ից որևէ մեկնաբանություն ստանալ այս հարցման վերաբերյալ, քանի որ կուսակցության ներկայացուցիչները չէին պատասխանում մեր հեռախոսազանգերին:
