Իրաքի արտգործնախարարն ուղարկվել է հարկադիր արձակուրդ
Արաբական «Աս-Սումարիա» հեռուստաալիքի փոխանցմամբ՝ Իրաքի արտգործնախարար Հոշիյար Զիբարին ուղարկվել է հարկադիր արձակուրդ: Այդպիսի որոշում է կայացրել Իրաքի վարչապետ Նուրի ալ-Մալիքին:
Վերջինիս որոշումը կապված է կառավարության նիստերին արտգործնախարարի մշտական բացակայության հետ: Իրաքի արտգործնախարարի պարտականությունները ժամանակավորապես կատարելու է էներգետիկ հարցերով փոխվարչապետ Հուսեին Աշ-Շահրիսթանին:
Քուրդ նախարարները, մարտից սկսած, բոյկոտում են կառավարության նիստերը, ինչի պատճառը դաշնային բյուջեի վերաբերյալ շիա վարչապետի հետ ունեցած տարաձայնություններն են:
Վերջին ամիսներին ցնցումները միայն ուժեղանում են Բաղդադի ու Հյուսիսային Իրաքի քրդական ինքնավարության փոխհարաբերություններում՝ կապված երկրի հյուսիսային հատվածում տարածքային վեճի, օտար ընկերությունների հետ նավթային պայմանագրեր կնքելու և լիազորությունների բաշխման հետ:
