Լեհաստանի ֆինանսների նախարարին պաշտոնանկ են արել ռուսաստանյան գազամուղի պատճառով
Լեհաստանի ֆինանսների նախարար Միկոլայ Բուձանովսկին պաշտոնանկ է արվել, քանի որ վարչապետ Դոնալդ Տուսկին տեղյակ չի պահել «Գազպրոմի» և լեհական PGNiG պետական ընկերության միջև ստորագրված հուշագրի մասին։ Այս մասին գրում է Gazeta Prawna թերթը։
Ֆինանսների նոր նախարար է նշանակվել Բուձանովսկու նախկին տեղակալ Վլոձիմեջ Կարպինսկին։
Ըստ Ֆրանս-Պրես գործակալության, Տուսկը նշել է, որ կադրային փոփոխությունները նպատակ ունեն վերականգնել հսկողությունը առանցքային պետական ընկերությունների նկատմամբ։
Փոխըմբռնման հուշագիրը, որը ստորագրվել է ապրիլի 5-ին, վերաբերում է Յամալ-Եվրոպա գազատարի երկրորդ մասի շինարարությանը՝ տարեկան 15 միլիարդ խմ հզորությամբ։ Գազատարի ճյուղը պետք է անցնի Լեհաստանի տարածքով՝ հասնելով Սլովակիա և Հունգարիա։
