ԱԺ-ում՝ ընտանյոք հանդերձ, կամ ովքե՞ր են պատգամավորների օգնականները

«Ազգային ժողովի կանոնակարգ» օրենքով` պատգամավորը կարող է ունենալ երկու օգնական, որոնցից մեկն աշխատում է վճարովի, իսկ մյուսը` հասարակական հիմունքներով: Վճարովի հիմունքներով աշխատող օգնականի հաստիքը սահմանվում է ԱԺ աշխատակազմի հաստիքացուցակով և աշխատանքի է ընդունվում ժամկետային պայմանագրով` համապատասխան պատգամավորի ներկայացմամբ:

Պատգամավորների համար օգնականների հաստիքը օրենքով նախատեսվել է 2008 թ. աշնանից: Հենց այդ պահից պատգամավորների մի մասը, օգտվելով այն առիթից, որ իրենք են ընտրում իրենց օգնականներին, այդ հաստիքով խորհրդարան տարան իրենց զավակներին և բարեկամներին: Այս մասին հաղորդում է hetq.am կայքը:

Իհարկե, գնալով կրճատվում է այդ երևույթը, սակայն դեռ կան պատգամավորներ, որոնց օգնականները իրենց երեխաներն են կամ այլ ազգականները:

Դժվար է ասել` պատգամավորների զավակներին ձգում է ամսական 100 հազար դրամ աշխատավա՞րձը, թե՞ նրանց նպատակը աշխատանքային գրքույկում համապատասխան գրառումն է, որ աշխատել են խորհրդարանում:

Կան պատգամավորներ, որոնց հասարակական հիմունքներով աշխատող օգնկանները ևս իրենց բարեկամներն են: Իհարկե, այստեղ 100 հազար դրամի մասին խոսք չկա, քանի որ ԱԺ-ից չեն վարձատրվում, սակայն, նրանք ազատ մուտք ու ելք ունեն խորհրդարան, դեսպանատներում և միջազգային կազմակերպություններում կարող են ներկայանալ որպես պատգամավորի օգնականներ եւ «առավելություններ» ունենալ:

Կան նաև պաշտոնյաներ, որոնք իրենց ազգականներին կամ զավակներին ևս տեղավորել են խորհրդարանում: Օրինակ` ԱԺ նախագահ Հովիկ Աբրահամյանի ռեֆերենտներից մեկը ՀՀԿ-ական պատգամավոր Հայկ Բաբուխանյանի դուստրն է` Զարուհի Բաբուխանյանը:

ԱԺ փոխնախագահ Էդուարդ Շարմազանովի խորհրդականը նախկին պատգամավոր, ներկայումս Գեղարքունիքի մարզպետ Ռաֆիկ Գրիգորյանի որդին է` Կարեն Գրիգորյանը: Նրանց անունները տեղադրված են նաև ԱԺ կայքում:

ՀՀԿ-ական պատգամավոր Գագիկ Մինասյանի վճարովի հիմունքներով օգնականը «Ավանի աղի կոմբինատ» ՓԲԸ-ի սեփականատեր, նախկին պատգամավոր Արեգ Ղուկասյանի որդին է` Արսեն Ղուկասյանը: Նշենք, որ Արսենը Գ. Մինասյանի օգնականն է դեռեւս նախորդ գումարման Ազգային ժողովից, երբ նրա հայրը դեռ պատգամավոր էր:

Կան պատգամավորներ, որոնք Ազգային ժողով չեն գալիս և չեն էլ մասնակցում երեք շաբաթը մեկ գումարվող լիագումար նիստերին, սակայն աշխատավարձ են ստանում ոչ միայն նրանք, այլև նրանց օգնական զավակները:

ԱԺ հասարակայնության և տեղեկատվության միջոցների հետ կապերի վարչությունից «Հետքին» տեղեկացրին, որ Ազգային ժողովի պատգամավորների օգնականների աշխատանքը նորմավորված չէ, նրանք իրենց գործունեությունը ծավալում են ըստ պատգամավորի կողմից տրված հանձնարարության, ըստ այդմ՝ տվյալ աշխատանքի համար նպատակահարմար վայրում:

Ստորև ներկայացնում ենք այն պատգամավորների ցանկը, որոնց օգնականները իրենց զավակներն են, կամ` այլ ազգականները:

Նշենք, որ ԱԺ-ից օգնականների ցանկը տրամադրում են առանց նրանց հայրանունները նշելու, որպեսզի շատերի «ինքնությունը» չպարզվի, մինչդեռ օգնական ունեցող պատգամավորների հայրանունները նշում են:

hetq.am