Ղազախստանում մեկնարկել է Իրանի ու «Վեցյակի» միջև բանակցությունների երկրորդ օրը
Իրանական ISNA լրատվական գործակալության փոխանցմամբ` Իրանի ու «Վեցյակի» միջև «միջուկային» բանակցությունները Ղազախստանի Ալմա Աթա քաղաքում շարունակվում են այսօր: Առաջին փուլը կայացել է երեկ:
Այսօր առավոտյան Իրանի ազգային անվտանգության բարձրագույն խորհրդի քարտուղար Սայիդ Ջալիլին բանակցել է ԵՄ-ի դիվանագիտության ղեկավար Քեթրին Էշթոնի հետ: Իսկ Ջալիլիի տեղակալ Ալի Բաղերին բանակցել է ֆրանսիական պատվիրակության ներկայացուցիչների հետ:
Արևմտյան դիվանագետները երեկվա հանդիպման արդյունքներով հայտարարել են, որ Իրանն ի վիճակի չէ տալ հստակ և կոնկրետ պատասխան այն առաջարկներին, որոնք միտված են փակուղային իրավիճակից դուրս գալուն: Իրանական կողմն իր հերթին հայտարարել էր որոշակի առաջընթացի մասին:
