Բոտուլիզմից տուժած 3 հիվանդների վիճակը ծանր է
2013թ. ընթացքում Հայաստանում բոտուլիզմի հետևանքով մահվան 1 դեպք է գրանցվել. մահացել է Վանաձորի 92-ամյա բնակիչը: Թունավորման պատճառը տնային պայմաններում պատրաստված կարմիր պղպեղի օգտագործումն է եղել: Ընդհանուր առմամբ, մինչ այժմ Հայաստանում գրանցվել է բոտուլիզմի 13 դեպք՝ 27 տուժածով: Այս մասին 168.am-ի հետ զրույցում ասաց ՀՀ առողջապահության նախարարության աշխատակազմի Պետական հիգիենիկ և հակահամաճարակային տեսչության սնուցման բաժնի գլխավոր մասնագետ Լիլիթ Գաբրիելյանը:
Վերջինիս խոսքով՝ այժմ բոտուլիզմ ախտորոշմամբ հոսպիտալացված է 6 հիվանդ. նրանցից երեքի`Վանաձորի բնակիչներ Գրետա և Վարսենիկ Ուլիբեկյանների և Վայոց Ձորի մարզի բնակիչ Աղավնի Գևորգյանի վիճակը ծանր է գնահատվում: Մեկը գտնվում է՝ «Էրեբունի», մյուս երկուսը՝ «Արմենիա» հանրապետական բժշկական կենտրոնում. «Հոսպիտալացված հիվանդներից 1-ը գրեթե պատրաստվում է դուրսգրման, նա վաղուցվա հիվանդ էր, «Էրեբունի» բժշկական կենտրոնում է գտնվում, մյուս երկուսի վիճակը միջին ծանրության է գնահատվում»,- ասաց Լիլիթ Գաբրիելյանը:
Ըստ նրա`չի կարելի ընդհանրացում անել, թե բոտուլիզմի դեպքերի հիմնական պատճառը պահածոյացված կարմիր պղպեղն է. «Պատճառը կարող է լինել ցանկացած պահածոյացված բանջարեղեն, որտեղ կա հարուցիչը: Ընդհանրապես այլ երկրներում պահածոներ պատրաստում են նաև այլ մթերքներից: Հայաստանի բնակլիմայական պայմաններում և ժողովրդի ավանդույթների համապատասխան՝ հիմնականում բանջարեղեն են պահածոյացնում: Պարզապես, երևի կարմիր պղպեղն անցյալ տարի փոքր-ինչ էժան է եղել, շատերն են պահածոյացրել: Համենայն դեպս, չենք կարող ասել, որ միայն կարմիր պղպեղի հետ է կապված: Բտուլիզմի դեպքեր կան շուշանի, ծիծակի, սմբուկի խավիարի պահածոներից»: Լիլիթ Գաբրիելյանը նշեց, որ գործարանային պայմաններում պատրաստված պահածոները բոտուլիզմի պատճառ չեն դառնում. «Գործարանային պայմաններում պահածոների ջերմային մշակումն իրականացվում է 120 C-ի պայմաններում. այդ պայմաններում բոտուլիզմի հարուցչի սպորները ոչնչանում են: Դա է պատճառը, որ մենք ասում ենք՝ օգտագործե՛ք միայն գործարանային պայմաններում պատրաստված պահածոները: Տնային պայմաններում այդպիսի ջերմաստիճան ապահովել հնարավոր չէ: Նույնիսկ մի քանի ժամ եռացնելուց հետո տնային պայմաններում նման ջերմաստիճան ապահովել հնարավոր չէ»:
Լիլիթ Գաբրիելյանը խորհուրդ է տալիս առհասարակ տնային պայմաններում պահածո չպատրաստել. «Եթե, այնուամենայնիվ, որոշել են պահածո պատրաստել, ապա բացելուց հետո գոնե, տեղափոխեն մեկ այլ կաթսայի մեջ, եռացնեն առնվազն 20-25 րոպե, հետո միայն օգտագործեն»: Հարցին` ինչո՞վ է պայմանավորում մասնագետը բոտուլիզմի դեպքերի թիվն այն դեպքում, երբ պարբերաբար ժողովրդին զգուշացվում է պահածոների վտանգի մասին, Լիլիթ Գաբրիելյանը պատասխանեց. «Անձամբ ես դա կապում եմ ժողովրդի, նիստուկացի, բնավորության հետ: Տվյալները վերլուծելիս՝ մենք տեսնում ենք, որ ավելի շատ գյուղական շրջաններում են դեպքերը գրանցվում: Գուցե իրենց հասանելի չեն այդ կայքերը, հեռուստատեսությունը: Ցանկացած կին մտածում է, որ այսքան տարի պահածո է պատրաստել, ոչինչ չի պատահել, բայց սա հրդեհի նման մի բան է, դեպքը մի անգամ է պատահում: Ոչ ոք երաշխավորված չէ, որովհետև այդ սպորներն այնքան անտեսանելի են, որ լվանալիս դա հնարավոր չէ տեսնել»:
