«Բա մենք կարո՞ղ է կապրիզ արեցինք»

Երեկ ԱԺ ՀԱԿ խմբակցության կողմից Ընտրական և Քրեական օրենսգրքերում փոփոխություններ կատարելու համար նախաձեռնած արտահերթ նիստը տապալվեց` քվորում չապահովելու պատճառով: ՀՀԿ-ից ներկա էին միայն ԱԺ փոխնախագահներ Հերմինե Նաղդալյանը և Էդուարդ Շարմազանովը: ԱԺ արտահերթ նիստից հետո որոշ հարցեր ուղղեցինք Է. Շարմազանովին:

– Ընդդիմադիր պատգամավորները կատարվածը բնութագրեցին` որպես հակասահմանադրական քայլ: Ինչո՞ւ ՀՀԿ-ն չմասնակցեց նիստին:

– Ծիծաղելի է, երբ ասում են` հակասահմանադրական է: Նախ` սահմանադրական կամ հակասահմանադրական լինելը որոշում է Սահմանադրական դատարանը, բայց իմ սուբյեկտիվ գնահատականով` 95թ. այս կողմ բազմաթիվ օրինակներ են եղել, երբ քվորումի բացակայության պատճառով նիստը չի կայացել:
  – Կնշե՞ք այդ օրինակներից:
– Պառլամենտական ընտրությունների նախընտրական շրջանում ես եղել եմ ԱԺ փոխնանախագահ, և 4-5 նիստ չի կայացել, և գրանցված էին ոչ թե 44 պատգամավոր, այլ 2-3 պատգամավոր: Հիմնականում ներկա չէին մեր ընդդիմադիր գործընկերները: Ավելին, ԱԺ կանոնակարգ-օրենքով նախատեսված է քաղաքական բոյկոտի ինստիտուտը, և սա դասական քաղաքական բոյկոտի օրինակ էր:
– Այսինքն` բոյկոտեցի՞ք:

– Իհարկե, բա կարո՞ղ է մենք կապրիզ արեցինք: Իրենք քաղաքական հնարքի գնացին, մենք էլ քաղաքական պատասխան տվեցինք: Ե՛վ ԱԺ կանոնակարգը, և՛ քաղաքականության օրենքները մեզ բոլորիս թույլ են տալիս, որպեսզի մարդիկ կարողանան օգտագործել քաղաքական բոյկոտի իրենց իրավունքը:

– ՀՅԴ պատգամավոր Արմեն Ռուստամյանն այսօր նշեց, որ կատարվածն էթիկայի խախտում է, և իրենք նամակով դիմելու են ԱԺ Էթիկայի հանձնաժողով:

– Էթիկայի հանձնաժողովը կորոշի, բայց ես` որպես ԱԺ փոխնախագահ, ասեմ, որ Էթիկայի հանձնաժողով դիմելու կարիք չկա, որովհետև Հանրապետական խմբակցությունն իրականացրել է գործառույթներ, որոնք բխում են ԱԺ կանոնակարգ-օրենքից, իսկ Էթիկայի հանձնաժողովը քննում է այն խնդիրները, որոնք դեմ են ԱԺ կանոնակարգ-օրենքին:

Իսկ այդ օրենքը քաղաքական խմբակցությունների և պատգամավորների համար նախատեսում է դիմել քաղաքական պայքարի: Եվ քաղաքական բոյկոտը համարվում է քաղաքական պայքարի ընդունված ձևերից մեկը, որն ամրագրված է ՀՀ Ազգային ժողովի կանոնակարգ-օրենքում: Եվ սա` ի գիտություն` ԱԺ կանոնակարգ-օրենքը լավ չուսումնասիրած պատգամավորներին: Եվ երկրորդը` եթե խոսքը գնում է էթիկայի մասին, ապա նույն Ձեր նշած պատգամավորը, իմ կողմից շատ հարգված Արմեն Ռուստամյանը և նրա կուսակից ընկերները, պառլամենտական ընտրությունների քարոզարշավի ժամանակ Ազգային ժողովի նիստերին չեն մասնակցել, և ասել, թե իրենք հակաէթիկական բա՞ն են արել:

Եվ երրորդը` չնայած դա հակաէթիկական չէ, բայց եթե իրենք ինչ-որ մեկից բողոքում են, թող նախևառաջ բողոքեն իրենց պատգամավորներից, նաև այլընտրանքային` այն 7-8 հոգուց, ովքեր ներկա չեն եղել:

– ՀԱԿ պատգամավոր Արամ Մանուկյանի խոսքով` Դուք նիստին գրանցվեցիք միայն իրենց հորդորներից հետո: Ինչո՞ւ չէիք ուզում գրանցվել:

– Ես չեմ գրանցվել, և դա իմ իրավունքն է: Պետք չէ խեղաթյուրել փաստերը: Նիստը համարվում է իրավազոր, երբ քվորում կա, իսկ եթե, երբ տաբլոյի վրա պատկերը տեսել եմ, որ քվորում չկա, չեմ մասնակցել: Եթե 65 հոգի, ես կլինեի 66-րդը: Ես չեմ մասնակցել հենց այդ պատճառով, որովհետև նիստը չի կայացել, իսկ եթե նիստը կայանար, բնականաբար, կգրանցվեի, որովհետև դա իմ պարտավորությունն է, բայց իմ իրավունքն է, եթե քվորում չկա` չմասնակցել, որովհետև կապ չունի` 44 է թե 61: Եվ պատգամավորները ճիշտ կանեն կանոնակարգային մոմենտները սովորեն:

– Ընդդիմադիր պատգամավորների խոսքով` ՀՀԿ-ն կարող էր մասնակցել, բայց չքվեարկել:

– Խորհուրդ կտայի մեր գործընկերներին` զբաղվել իրենց պրոբլեմներով, որովհետև իրենց ներսի պրոբլեմները շատ ավելի շատ են, և հանրապետականների դարդ ու ցավով չտառապել: Հանրապետականն է որոշում` ինչպե՞ս իրականացնել իր քաղաքական պայքարը: Հանրապետականները հանդուրժող են քաղաքական փոքրամասնության նկատմամբ, երբեք քաղաքական փոքրամասնությանը չի ստիպել, չի ուղղորդել, թե ինչպիսի՞ պայքար մղի, այնպես որ, թույլ տվեք` մենք ինքներս որոշենք, մանավանդ, դրա իրավունքն ունենք:

«168 ԺԱՄ»