Փիղը դատի է տվել թերթին
Հայտնի բլոգեր Տիգրան Քոչարյանը, ով համացանցային հանրությանը հայտնի է «Փիղ» մականունով, դատի է տվել «Չորրորդ իշխանություն» օրաթերթին` իր հասցեին հնչեցրած «զրպարտության և վիրավորանք պարունակող հայհոյանքների համար»:
168.am-ի հարցին, թե ինչու է Տիգրան Քոչարյանը դատի տվել լրատվամիջոցին, վերջինս պատասխանեց. «Հրապարակված հոդվածը դուրս է լրագրողական նյութ գրելու օրենքներից, անգամ հետաքննական լրագրությունից: Ուղղակի որոշել են հայհոյել, ու դա էլ տպագրել են: Իմ կարծիքով` նման բաներին պետք է վերջ տալ: Մինչ այս` «Ֆաշիստն ու փիղը» խորագիրը կրող հոդվածի, եղել են նաև սրան նախորդող երկու նմանատիպ հոդվածներ: Այդ հոդվածներում ևս հնչել են անհիմն վիրավորանքներ, զրպարտություններ, և դա շարունակական բնույթ է կրել: Առաջին հոդվածն ուսումնասիրել էի, բայց քանի որ մեզ մոտ ընդունված չի լրատվամիջոցին դատի տալ, դա շատ հարցեր է առաջացնում, ժամանակ է պահանջում և այլն, որոշել եմ առանձնապես չանդրադառնալ դրան: Ես ընդհանրապես կարծում եմ, որ լրագրությունն ու հայհոյանքը իրար հետ կապ չունեն: Հետո հասկացա, որ դա շարունակական բնույթ է կրում: Նույն լրատվամիջոցն ինձ տարբեր կերպ էլի շարունակում է անդրադառնալ: Այս երրորդ հոդվածից հետո արդեն ուղղակի չդիմացա»:
