«Հնարավոր է ատոմակայանի աշխատանքներն ավելի շուտ ավարտել, որը կբերի սակագնի իջեցման». Սուրեն Ազատյան
![](https://168.am/wp-content/uploads/2018/07/Suren-Azatyan.jpg)
«Մինչև այսօր մեր ատոմակայանի վերաթողարկված բլոկը որևէ մեկին քննադատելու, վախենալու առիթ չի տվել։ 2012թ. սկսեց մշակվել ևս 10 տարով շահագործումը երկարացնելու ծրագիրը, որն այս պահին իրագործման փուլում է»,- այսօր լրագրողների հետ հանդիպման ընթացքում այս մասին ասաց Ատոմային էներգետիկայի վետերանների խորհրդի նախագահ, ՀԱԷԿ-ի նախկին գլխավոր տնօրեն Սուրեն Ազատյանը՝ ընդգծելով, որ մինչև հոկտեմբեր կթողարկվի մի տուրբոագրեգատը, իսկ հաջորդը՝ մինչև դեկտեմբերի 31-ը։
Նա ասաց, որ նամակ են գրել ՀՀ վարչապետ Նիկոլ Փաշինյանին՝ նշելով, որ, եթե այլ համակարգերում կարելի է սխալ թույլ տալ, ապա ատոմակայանի դեպքում սխալվել չի կարելի. «Մենք խնդրեցինք, որ ատոմակայանի ղեկավարության, մասնագետների և մեր մասնակցությամբ քննարկում կազմակերպեն՝ անպայման նախարարի մասնակցությամբ։ Նամակին պատասխանեցին, որ նախարարին՝ պարոն Գրիգորյանին, հանձնարարական էր տրվել, և նա փորձել է քննարկում անցկացնել։ Մեզ մտահոգում է այն, որ էներգետիկայի հարգելի պարոն նախարարն ասաց, որ, եթե ատոմակայանի աշխատանքները ժամանակին ավարտվեն, նոր կերևա՝ սակագինը վերանայե՞լ, թե՞ ոչ։ Այսօր դա ամենակարևոր հարցերից մեկն է, ամբողջ ժողովուրդն է դրան սպասում։ Ատոմակայանի վերանորոգման աշխատանքները նախատեսված է ավարտել դեկտեմբերի 31-ին, եթե մեկ օր ուշանա, ապա 240 մլն դրամի վնաս ենք կրելու։ Նախարարը «եթե»-ով չպետք է խոսի»։
Նրա խոսքով՝ հնարավոր է ատոմակայանի աշխատանքներն ավելի շուտ ավարտել, որը կբերի սակագնի իջեցման. «Մյուս խնդիրն այն է, որ ատոմակայանի աշխատակազմը պետք է լուրջ վերապատրաստում անցնի։ Երրորդը մարդկանց բարոյահոգեբանական վիճակն է։ Մտահոգություններից մեկն այն է, որ մեծ ծավալով աշխատանք է կատարվում, մոդեռնիզացվում է համակարգը, բայց չէ՞ որ հետագայում շահագործող մարդիկ էլ պետք է այդ աշխատանքներին մասնակցեն, սա վերին աստիճանի կարևոր է»։
Նա նաև խնդրահարույց է համարում այն, որ Ատոմակայանը վերակառուցվում է վարկային միջոցների հաշվին. «Այս ի՞նչ ենք վարկ վերցրել, ի՞նչ է՝ ատոմակայանն այս ընթացքում անդադար աշխատելով փող հետ չի՞ գցել, ինչի՞ ենք ուրիշին դարձնում մեր գլխի տերը»։
Մանրամասները՝ 168.am-ի տեսանյութում