ԵԱՏՄ-ում կստեղծվի կենդանական և բուսական ծագման ապրանքների նկատմամբ էլեկտրոնային վերահսկողության համակարգ
Եվրասիական տնտեսական միությունում կենդանական և բուսական ծագման ապրանքների նկատմամբ վերահսկողության էլեկտրոնային համակարգ կստեղծվի: Ինչպես տեղեկացրին Եվրասիական տնտեսական հանձնաժողովից, հարցը ԵԱՏՄ անդամ երկրների համապատասխան մարմինների ղեկավարների մասնակցությամբ քննարկվել է Եվրասիական տնտեսական հանձնաժողովում կայացած խորհրդակցության ընթացքում: Խորհրդակցությունը նախաձեռնել է Եվրասիական տնտեսական հանձնաժողովի տեխնիկական կարգավորման հարցերով նախարար Վալերի Կորեշկովը:
Կորեշկովն առաջարկել է ԵՏՀ-ում ստեղծել աշխատանքային խումբ, որը թվային փոխգործակցության միասնական մոտեցումներ կմշակի` ներառյալ ԵԱՏՄ անդամ երկրներում անասնապահական էլեկտրոնային լիազորագրերի կիրառումը:
«Եվրասիական տնտեսական միությունում ապրանքների փոխադրումը պետք է ամբողջովին թափանցիկ լինի: Վերահսկողության ժամանակակից տեղեկատվության համակարգի ներդրումը թույլ կտա հասկանալ կարանտինային և ֆիտոսանիտարական վերահսկողության ենթակա արտադրանքի տեղաշարժը բոլոր փուլերում»,- ասել է Վալերի Կորեշկովը:
