ԿՈՂԱԿԻՑՍ ՄԻՔԱՅԵԼ ՊՈՂՈՍՅԱՆՆ ԷՐ. ԱՄՈՒՍՆՈՒԹՅԱՆ ԿԱՐՈՂ ԷԻՆՔ ԳՆԱԼ, ԲԱՅՑ… ՉՍՏԱՑՎԵՑ
Հայկական թատրոնի և կինոյի սիրված դերասանուհի Մարիամ Դավթյանը տարիների ընթացքում հանդիսատեսի համար դարձել է ոչ միայն բեմի և էկրանի ճանաչված դեմք, այլև անկեղծության, ուժի և ներքին զգայունության խորհրդանիշ։
168TV-ի «Ռանդևու» հաղորդման ընթացքում նա բացեց իր կյանքի ամենաջերմ ու ամենացավոտ էջերը՝ խոսելով մանկության, սիրո, ընտանիքի, արտագաղթի, արվեստի և կյանքի հանդեպ իր վերաբերմունքի մասին։
Երջանիկ մանկություն՝ չափազանց մեծ սիրո մեջ
Մարիամ Դավթյանը ծնվել է ճարտարապետների ընտանիքում և մեծացել բացառիկ ուշադրության ու սիրո մթնոլորտում։ Նա հիշում է խորհրդային տարիների բակը, ծնողների անվերապահ աջակցությունը և բազմազան զբաղմունքները՝ պար, լող, երաժշտություն, սպորտ։ Սակայն այդ մեծ սերն ու հոգատարությունը երբեմն նույնիսկ «չափից շատ» էր թվում փոքրիկ Մարիամին։ Այսօր, երբ շատ հարազատներ այլևս չկան, դերասանուհին խոստովանում է՝ այդ տարիներն իր կյանքի ամենամեծ հարստություններից են։
Սեր, վաղ ամուսնություն և դժվար բաժանում
Մարիամ Դավթյանն ամուսնացել է 15 տարեկանում, ինչին դեմ էր ընտանիքը։ Ասում է՝ դա առաջին մեծ սերն էր, որը ստիպեց իրեն գնալ բոլորի դեմ։ Նա չի ափսոսում, քանի որ այդ ամուսնությունից ծնվեց իր դուստրը, բայց միաժամանակ երիտասարդներին խորհուրդ է տալիս չշտապել ընտանիք կազմելու հարցում. այդ տարիքում մարդը դեռ պետք է սովորի, կրթվի և ճանաչի ինքն իրեն։
Ամուսնալուծության պատճառների մասին խոսելիս դերասանուհին նշում է աշխարհայացքների տարբերությունը, անհամաձայնությունները և այն փաստը, որ իր նախկին ամուսինը չէր ցանկանում, որպեսզի ինքը դերասանուհի դառնա։
Նոր կյանք Իսրայելում՝ 50 դոլարով
Ամուսնալուծությունից հետո Մարիամ Դավթյանն ընտանիքի հետ տեղափոխվել է Իսրայել։ Գրպանում ընդամենը 50 դոլար ունենալով՝ նա կյանքը սկսեց զրոյից։ Սկզբում աշխատեց ծաղկավաճառուհի, կատարեց նաև ծանր աշխատանքներ, սակայն այդ ամենն ընդունեց որպես փորձություն և նոր դեր, որը պետք էր խաղալ՝ նպատակներին հասնելու համար։
Նրա ամենամեծ հաղթանակը դարձավ եբրայերենի արագ յուրացումը և Իսրայելում թատրոնում խաղալու հնարավորությունը։ Սակայն նույնիսկ մասնագիտական հաջողությունները չստիպեցին նրան հաղթահարել հայրենիքի կարոտը:
Մոր կորուստը՝ ամենածանր ցավը
Դերասանուհին առանձնակի հուզմունքով է խոսում մոր մահվան մասին։ Մարիամ Դավթյանը մինչ օրս մեղադրում է իրեն, որ չհասցրեց մորն ավելի շուտ վերադարձնել Հայաստան։ Մոր լուսանկարներին նայելը նրա համար դեռևս ծանր փորձություն է։ «Մայր կորցնելը կյանքի ամենածանր ցավերից մեկն է»,- ասում է նա։
Միքայել Պողոսյանի հետ հարաբերությունների մասին
Տարիներ շարունակ Մարիամ Դավթյանը երբեք հրապարակավ չէր խոսել իր անձնական հարաբերությունների մասին։ Մեզ հետ հարցազրույցում նա հաստատեց, որ երկար տարիներ իր կողքին եղել է դերասան Միքայել Պողոսյանը։
Նա ընդգծեց՝ մինչև այսօր մեծ հարգանքով և սիրով է վերաբերվում նրան, սակայն չի ցանկանում մանրամասնել այդ հարաբերությունները, որովհետև յուրաքանչյուր պատմության մեջ կա երկու մարդ, և երկրորդ կողմի համաձայնությունը կարևոր է։
«Ես այդքան ուժեղ կին չեմ»
Չնայած արտաքինից ուժեղ և ինքնավստահ կնոջ տպավորությանը՝ Մարիամ Դավթյանն ասում է, որ հաճախ լաց է լինում, հուզվում և դժվարանում է որոշումներ կայացնել։
Նրա կարծիքով՝ երջանկությունը կախված չէ ուժեղ կամ թույլ լինելուց․ մարդն ինքն է ընտրում՝ ինչպես վերաբերվել կյանքի փորձություններին։
Հայկական կինոյի և թատրոնի խնդիրները
Դերասանուհին մտահոգված է հատկապես կինոյում կնոջ կերպարի բացակայությամբ։ Նրա կարծիքով՝ այսօր կա կա՛մ զվարճացնող կինո, կա՛մ հեղինակային ֆիլմեր, բայց բացակայում է այն միջին օղակը, որը ժամանակին ստեղծում էր հիշվող կերպարներ և սերունդներ դաստիարակում։
Մարիամ Դավթյանը ցավով նշում է, որ 50 տարեկանից բարձր դերասանուհիների համար գրեթե չեն ստեղծվում հետաքրքիր կերպարներ, և դա ոչ միայն իր, այլև ամբողջ կինոյի խնդիրն է։
Նա նաև պաշտպանում է սերիալներում նկարահանվող պրոֆեսիոնալ դերասաններին՝ ընդգծելով, որ դերասանը միշտ չէ, որ կարող է ընտրել իր առաջարկները, իսկ սերիալները շատերի համար նաև ապրուստի միջոց են։
Կյանքի նկատմամբ խաղաղ վերաբերմունք
Հարցազրույցի ամենաանսպասելի հատվածներից մեկը մահվան թեման էր։ Դերասանուհին խոստովանեց, որ իր սեփական մահվան մասին կարողանում է խոսել հանգիստ և առանց վախի։ Նրա համար կարևոր է միայն, որ այդ պահը լինի թեթև և առանց տառապանքի։
Թոռների ժպիտը՝ նոր երջանկություն
Այսօր Մարիամ Դավթյանի կյանքի ամենամեծ ուրախություններից են թոռները։
Մարիամ Դավթյանի պատմությունը մի կնոջ պատմություն է, որը սիրել է, սխալվել, պայքարել, կորցրել և կրկին շարունակել ապրել։ Նրա խոսքերում չկա ինքնագովեստ, կա միայն կյանքի հանդեպ անկեղծ վերաբերմունք։ Եվ, թերևս, հենց այդ պատճառով էլ նա շարունակում է մնալ հանդիսատեսի համար հարազատ ու վստահելի կերպար։
«Մարդը ինքն է որոշում՝ երջանիկ լինե՞լ, թե՞ ոչ»,- ասում է դերասանուհին։
Նրա ամբողջ կյանքը կարծես այդ մտքի ապացույցն է։
Մանրամասները՝ տեսանյութում
