Արմաշի հոգեբուժարանի պացիենտներն իրենց խնամելու համար կենսաթոշակի մի մասը տալիս են աշխատակիցներին. ՄԻՊ
Մշտադիտարկումների ընթացքում Արմաշի հոգեկան առողջության կենտրոնում ներկայացվել են բողոքներ և տվյալներ, որ կենսաթոշակ ստացող պացիենտները կենսաթոշակի գումարի մի մասը տալիս են աշխատակիցներին՝ իրենց խնամելու համար:
Այսօր լրագրողների հետ հանդիպմանը «Հոգեբուժական կազմակերպություններում հոգեկան առողջության խնդիրներ ունեցող անձանց իրավունքների ապահովման վերաբերյալ» արտահերթ զեկույցի արդյունքները ներկայացրեց Հայաստանի մարդու իրավունքների պաշտպան Արման Թաթոյանը:
«Բացակայում են հոգեկան առողջության խնդիրներ ունեցող անձանց կենսաթոշակ տրամադրելու և այդ անձանց կողմից այն ինքնուրույն տնօրինելու մեխանիզմները: Արմաշի հոգեկան առողջության կենտրոնում ներկայացվել են բողոքներ և տվյալներ, որ խնդիրներ ունեցող և կենսաթոշակ ստացող անձանց կենսաթոշակի գումարի մի մասը պացիենտները տալիս են աշխատակիցներին՝ իրենց պահելու համար»-ասաց Թաթոյանը:
Այդ հարցով ՀՀ գլխավոր դատախազություն է ուղարկվել գրություն: ՄԻՊ-ը հույս ունի՝ պարզապես ուսումնասիրություն է իրականացվելու:
«Մեր իրավասությունների սահմաններում մենք չունենք այն գործիքակազմը, որպեսզի ստուգումներ իրականացնենք: Եվ լուծումն ապահովել ենք այդպես»,-նշեց նա:
Զեկույցը նպատակ չունի գնահատական տալ բժիշկների աշխատանքին, նրանց ծառայությունների որակին: Այն բացառապես նպատակ ունի վերհանել հոգեբուժական օգնության և սպասարկման ոլորտի խնդիրները:
2017-ին հոգեբուժական կազմակերպություններում իրականացվել են մշտադիտարկման այցեր, կատարվել են անհրաժեշտ ուսումնասիրություններ: Մշտադիտարկման այցերը կատարվել են Մարդու իրավունքների պաշտպանի աշխատակազմի խոշտանգումների և վատ վերաբերմունքի կանխարգելման վարչության մասնագետների և կանխարգելման ազգային մեխանիզմի անկախ փորձագետների՝ իրավաբանների, սոցիոլոգների, հոգեբանների, բժիշկների և հոգեբույժների կողմից՝ միջազգայնորեն ընդունված ուղեցույցի համաձայն և հատուկ մեթոդաբանությամբ:
