Ֆրանկֆուրտում վնասազերծել են Երկրորդ աշխարհամարտի հզոր մի ռումբ
Գերմանիայի Ֆրանկֆուրտ քաղաքում հայտնաբերվել էր հզոր մի ռումբ, որը Երկրորդ աշխարհամարտի տարիներին բրիտանական օդուժը նետել էր գերմանական քաղաքի վրա: Մասնագետներին հաջողվեց վնասազերծել այն: Այս մասին հաղորդում է «Ամերիկայի ձայնը»:
«Ամեն ինչ լավ անցավ, առանց խնդրի: Առավոտյան ժամը 6:30-ից այստեղ էինք, պատկերացնում եք որքան լարված էինք: Սակայն, երբ սկսում ես աշխատել, սառնասիրտ ես մոտենում, ու ինչպես տեսնում եք, ամեն ինչ նորմալ է»,- ասում է ռումբերի վնասազերծման մասնագետ Դիթեր Շվեթցլերը:
Երկրորդ աշխարհամարտի օրերի բրիտանական ռումբերը դժվար են վնասազերծվում:
«Մենք սկզբից հանեցինք պայթուցիկը, այնուհետև՝ դետոնատորները: Այնքան էլ հեշտ չէր հանել դետոնատորները, քանի որ ռումբը կարող էր պայթել, եթե որևէ քիմիական գործընթաց ընթանար»,- ասում է մեկ այլ մասնագետ Ռենե Բեներթը:
1,4 տոնա քաշ ունեցող այս ռումբը հայտնաբերվել էր անցած շաբաթ շինարարական աշխատանքների ընթացքում:
Վնասազերծման աշխատանքներում ներգրավված են եղել անգամ ուղղաթիռներ: Ոստիկանությունը 1,5 կիլոմետր շառավղով փակել էր ճանապարհը՝ իրականացնելով Երկրորդ աշխարհամարտից ի վեր մարդկանց ամենամեծ տարհանումը:
Տարհանված մարդկանց շարքում էին մոտակա երկու հիվանդանոցների շուրջ 100 հիվանդներ: Փորձագետները զգուշացնում էին, որ ռումբի պայթյունի պարագայում լուրջ վնաս կհասցվեր քաղաքի արևմտյան հատվածին:
