«Տարվա կտրվածքով ունենք նախատեսված նոր ընկերություններ, որոնք պիտի տանենք մասնավորեցման». Վոլոդյա Գասպարյան

Պետական գույքի կառավարման ոլորտում կատարված բարեփոխումների, հանրության ուշադրության կենտրոնում գտնվող  Մարզահամերգային համալիրի և «Հայֆիլմի» ճակատագրերի և այլ հարցերի շուրջ «Արմենպրես»-ը զրուցել է ՀՀ կառավարությանն առընթեր Պետական գույքի կառավարման վարչության պետի տեղակալ Վոլոդյա Գասպարյանի հետ։

– Պետական գույքի կառավարման ոլորտում ի՞նչ բարեփոխումներ են արվում` կառավարման արդյունավետությունը բարձրացնելու համար:  

– Պետական գույքի կառավարման ոլորտի ամենակարևոր ձեռքբերումներից մեկը վերջին տարիներին՝ 2014 թվականի նոյեմբերի 20-ին Ազգային ժողովի կողմից ընդունված «Պետական գույքի կառավարման մասին» օրենքն է։ Այն կարգավորում է պետական գույքի կառավարման ողջ դաշտը և ոլորտում դրանից բխող իրավական հարաբերությունները։ Օրենքից ելնելով կատարվել են փոփոխություններ իրավական ակտերում, ու այդ ամենն ավելի արդյունավետ է դարձրել պետական գույքի կառավարումը։

Կատարված աշխատանքներից կարող եմ առանձնացնել 2011-2016 թթ. 362 ընտանիքների 404 սենյակի հատկացումը, այսինքն` 899 անձ ապահովվել է տանիքով։ Այդ անձանց մի մասը եղել են ՀՀ քաղաքացիներ, մյուս մասը` Ադրբեջանից բռնագաղթած ընտանիքներ, ովքեր ապրել են հանրակացարաններում։ Գործընթացը շարունակվում է, մեր վարչության համապատասխան ստորաբաժանումները աշխատում են քաղաքացիների հետ` ավելի արագ և արդյունավետ կազմակերպելու համար զբաղեցրած սենյակների սեփականաշնորհումը: Մենք ցանկանում ենք հասցնել այս ծրագիրը իր տրամաբանական ավարտին, որպեսզի յուրաքանչյուր քաղաքացի, ով ապրում է Հայաստանի Հանրապետությունում, կարողանա ունենալ իրեն հատկացված տարածքը և այդ տարածքում՝ սեփականության իրավունք։

– Ի՞նչ սկզբունքով են ընտրվում ընտանիքները:  

– Ընտանիքներին ընտրում են հստակ չափորոշիչներով,  ըստ կառավարության համապատասխան որոշման։ Այն ընտանիքները, որոնք համապատասխանում են այդ ստանդարտներին, ներկայացնում են փաստաթղթեր, որոնց  իսկությունը  պարզում են մեր մասնագետները: Դրանք այն ընտանիքներն են, որոնք առնվազն հինգ տարի ապրում են հանրակացարաններում կամ ուսուցչի տներում, չունեն այլ սեփականություն

– Պետգույքի կառավարման վարչությունն իր գործառույթներից բխող ինչ հիմնական անելիքներ ունի այս տարի:  

– Հիմնական գործառույթներից մեկը պետական բաժնեմաս ունեցող առևտրային կազմակերպությունների մասնավորեցումն է։ Տարվա կտրվածքով ունենք նախատեսված նոր ընկերություններ, որոնք պիտի տանենք մասնավորեցման։ Այս տարի երեք ընկերությունների համար նախապատրաստվել են փաթեթներ, գնահատվել են, որից հետո կառավարություն ենք ներկայացրել: Մեր բոլոր քայլերն ուղղված են պետական  գույքի կառավ արման  արդյունավետության բարձրացմանը և այս առումով մեզ հաջողվում է դրական արդյունք արձանագրել շատ ուղղություններով:

– Քանի՞ ընկերություն կա վարչության ենթակայության տակ:  

– Պետական գույքի կառավարման վարչության ենթակայության տակ կա 25 ընկերություն։ Դրանցից 4-ը՝  80 տոկոս պետական բաժնեմասով, 16-ը՝ 100 տոկոս և 5-ը` 50 տոկոսից պակաս պետական բաժնեմաս ունեցող ընկերություններ են: Հիմնական ընկերությունների մեծ մասը չի աշխատում, իր նպատակային գործառույթները չի իրականացնում։ Մեր խնդիրն է շատ կարճ ժամանակա հատվածում այս ընկերությունները մասնավորեցնելը: Գնորդի խնդիր կա, սակայն  հույս ունենք, որ կգտնվեն հետաքրքրվողներ:

Մենք այդ գույքը կարող ենք նաև հավատարմագրային  կառավարման հանձնել. կառավարման  տարբեր ձևեր կան։ Ներդրումների ցանկություն ունեցողների հետ մենք կարող ենք քննարկել և համապատասխան որոշումներով տրամադրել նրանց գույքը կամ ընկերությունները։

– Հայտնի է, որ ԱՊՀ –ում  Հայաստանի փորձը պետգույքի կառավարման ոլորտում ուսանելի է և փորձի փոխանակման հա մար Ղրղզստանի պատվիրակությունը վերջերս այցելել էր Հայաստան։ Ի՞նչ է տալիս մեզ նրանց այցը, ի՞նչ ենք մենք փոխանցում մեր գործընկերներին։

– Մենք պետք է փորձենք նպատակային՝ երկու ուղղություններով օգտագործել ցանկացած երկրի պատվիրակության այցը Հայաստան։ Առաջինը՝ տվյալ ոլորտի հետ կապված, մենք պետք է կարողանանք փորձի ու գիտելիքի փոխանակում կատարել։ Ղրղզստանի մեր գործընկերների հետ մեզ դա հաջողվեց անել, քանի որ նրանց կարծիքով մենք ոլորտում առաջատար ենք,  նրանք մեզ նից ստացան իրենց հուզող հարցերի պատասխանները։ Երկրորդ՝ ամենակարևոր ուղղությունը, ինձ համար, որպես պետական պաշտոնյա և քաղաքացի, այն է, որ մենք ցանկացած այցի ժամանակ պետք է կարողանանք մեր երկիրը ներկայացնել առավելագույն բարձր մակարդակով։

-Մարզահամերգային համալիրի խնդիրն արդեն երկար ժամանակ քննարկվում է։ Ի՞նչ նորություններ կան այդ հարցի վերաբերյալ:  

– Մարզահամերգային համալիրին վերաբերող գործընթացների և կառավարման հետ կապված կա մի հիմնական նպատակ. այն է՝ որպեսզի այն հանձնվի կառավարման կամ մասնավորեցվի։ ՄՀՀ-ն անհրաժեշտ է մեր երկրին, մեր ժողովրդին և պետք է հոգատար ձեռքերում հայտնվի: Տեղյակ եք` ՄՀՀ-ն ունեցել է սեփականատեր, ումից ԴԱՀԿ-ն պարտքերի պատճառով գույքը առգրավել է և 2014 թվականի օգոստոսի 26-ին հանձնել Ֆին անսների նախարարությանը։ Այս ամենից հետո անշարժ գույքի հիման վրա ստեղծվել է «Մարզահամերգային համալիր» ՊՈԱԿ-ը, որը հանձնվել է Պաշտպանության նախարարության ենթակայությանը։

2015 թվականի օգոստոսի 13-ին կառավարության որոշումով ՄՀՀ-ի գույքը վաճառվել է «ՆԱՏԱ Ինվեստ» ՍՊԸ-ին։ 2016 թվականին կառավարության որոշումով, պետությունը չեղյալ է համարել պայմանագիրը և մեկ այլ որոշումով, ՊՆ-ից գույքը հանձնվել է Պետական գույքի կառավարման վարչությանը։  Համալիրում կար շարժական գույք, որը պատկանում էր նախկին սեփականատերերին, ովքեր ունեին բազմաթիվ պարտքեր։ Սնանկության վարույթ է հարուցվել և սնանկ ճանաչված ընկերության գույքը տնօրինում էր սնանկության կառավարիչը։ Քանի որ համալիրը պետական սեփականություն էր ՊՈԱԿ-ի կարգավիճակով, այդ օբյեկտի գործունեությունը շարունակելու համար մեզ անհրաժեշտ էր ունենալ համապատասխան գույք։ Այդ ամենից հետո պետությունը որոշում կայացրեց սնանկության կառավարչից գնել համապատասխան գույքը 1 մլրդ 040 մլն 900 հազար 800 դրամով։

– Ինչպե՞ս եք իրականացրել գույքի ձեռքբերումը:  

– Մեր վարչությունն գույքի ձեռքբերումը գնումների սահմանված ընթացակարգով է իրականացրել: Սնանկության կառավարչի հետ կնքվել է համապատասխան պայմանագիր, կատարվել է ընդունում-հանձնումը։ Մոտ ժամանակներս, քանի որ որոշման մեջ հստակ գրված է, որ գույքը ձեռք բերելուց հետո հանձնվի Մարզահամերգային համալիրին, անհատույց օգտագործման իրավունքով, մենք գույքը կհանձնենք ՄՀՀ-ին և այն կշարունակի իր բնականոն գործունեությունը։

– Ի՞նչ կարող եք ասել «Հայֆիլմ»-ի ճակատագրի մասին:  

– 2015 թվականի դեկտեմբերի 24-ին բաժնետոմսերի ընդունման-հանձնման արդյունքում «Հայֆիլմ»-ը նախկին սեփականատերերից անցել է Պետական գույքի կառավարման վարչությանը։ Ձեռք բերելուց հետո մենք կատարեցինք բազմաթիվ փոփոխություններ՝ նշանակվեց նոր տնօրեն,  գույքագրում իրականացվեց ու գործողությունների ծրագիր մշակվեց: Միայն մեկ օրինակ բերեմ.  եթե նախկինում ֆիլմերի ցուցադրության արդյունքում տարեկան 2 մլն  դրամ գումար էր գոյանում, ապա այժմ՝ նոր տնօրենի և աշխատակազմի ծավալած գործունեության շնորհիվ, դարձել է տարեկան 13 մլն:

– Ի՞նչ բարեփոխումներ են արվել «Հայֆիլմ»-ում:  

– Հայ Ֆիլմի տարածքը ապահովվել է ինտերնետ ծածկույթով, որը հնարավորություն կտա ցանկացած նկարահանողի կամ ֆիլմ արտադրողի ուղիղ եթեր ապահովել այնտեղից։ Աղբահանություն է կազմակերպվել, գարն անը, բացի  շաբաթօրյակներից, նախատեսվում է իրականացնել ծառատունկ, կանաչապատել տարածքը և բարելավել տաղավարները։
-Ինչպիսին ենք ցանկանում տեսնել «Հայֆիլմ»-ը` վերջնական արդյունքում:

– Վերջնական նպատակը պիտի լինի մասնավորեցումը։ Դրա շնորհիվ մենք «Հայֆիլմը» կտեսնենք ոչ թե որպես տարածք, որը պահպանում է իր գոյությունը, այլ կառույց, որն իրականացնում է ֆիլմարտադրություն։ Մեր նպատակն է ստեղծել այնպիսի միջավայր, որտեղ կստեղծվեն ֆիլմեր, որոնք մրցունակ լինեն ոչ միայն ԱՊՀ երկրներում, այլ հեռավոր արտերկրում:

Հարցազրույցը` Լիլիթ Դեմուրյանի