Դիմակներ չոր մաշկի համար

Մաշկի հաճախակի խնամքը հաճախ հսկայական ֆինանսական միջոցներ է պահանջում: maskifase կայքը ներկայացնում է բնական միջոցներով պատրաստված մի քանի դիմակներ, որոնք կօգնեն հոգ տանել չոր մաշկի մասին: Եթե ցանկանում եք հասնել լավագույն արդյունքի, ապա այս դիմակները պետք է օգտագործել կանոնավոր կերպով:

Ընդհանուր խորհուրդներ

Դիմակներն օգտագործելուց առաջ անհրաժեշտ է հիշել, որ`

• Դիմակը տարածում են նախապես մաքրած դեմքին:
• 15-20րոպե հանգիստ պետք է պառկել, աչքերին խոտաբույսերի թուրմի թրջոցներ դնել:
• Մաքրել դիմակը սովորական ջրով՝ սառը կամ տաք:

Այս տեսակ դիմակները չոր մաշկին պետք է դնել շաբաթը մեկ անգամ: Յուրաքանչյուր կին գիտի, որ կարևոր է նաև պարանոցի խնամքը:

Լինում է, որ հաճախ որոշ կանանց մոտ մաշկը շատ չոր է, այդ իսկ պատճառով խորհուրդ է տրվում մաշկն անընդհատ մաքրել տնական պատրաստված լոսյոններով՝ բացառելով ջրային լվացումները:

Մեղրով դիմակ

100գ մեղրը, 100գ ձիթայուղն ու ձվի 2 դեղնուցը հարել: Ստացված խառնուրդից մի փոքր մաս քսել դեմքին և թողնել մնա 15-20 րոպե: Ապա բամբակով և տաք ջրով մաքրել դիմակը դեմքից: Այս դիմակը կարող եք պահել մի քանի օր: Դիմակն օգտագործվում է չոր, գրգռված մաշկի համար՝ հարթեցնելու նորահայտ կնճիռները:

Սպիտակուցային դիմակ

Ձեզանից կպահանջվի միայն ձվի սպիտակուց: Դիմակը տարածելուց առաջ դեմքը մաքրեք քսուքով և միայն 3-5 րոպե հետո տեղադրեք դիմակը: Ձվի սպիտակուցը հարեք՝ մինչև փրփուրանման զանգված ստանալը, ապա զանգվածը քսեք դեմքին և պարանոցի վերին հատվածին: Դիմակին կարող եք նաև մի փոքր մեղր ավելացնել: Սպիտակուցը դեմքի վրա վերածվում է թաղանթի: Այս դիմակը հրաշալի է լայնացած ծակոտիների և կնճիռների դեպքում:

Լոբով դիմակ

Լոբին թրջեք և եփեք, ապա քերեք այնքան, մինչև խյուսանման զանգված ստանաք: Խյուսին մի փոքր ձիթայուղ կամ ձիթապտղի յուղ և կես կիտրոնի հյութ ավելացրեք: Ստացված զանգվածը քսեք դեմքին և 15-20 րոպե անց մաքրեք տաք ջրով:

Բանանով դիմակ

Բանանը տրորեք, ավելացրեք մի փոքր ձիթայուղ կամ ձիթապտղի յուղ: Քսեք դեմքին, թողեք մնա 20-25 րոպե, լվացեք տաք ջրով:

Նյութը հրապարակման պատրաստեց Լիլիթ Հարությունյանը