Բերուչաշվիլին ու Սթոլթենբերգը քննարկել են ռուս-աբխազական պայմանագիրը
Новости-Грузия լրատվական գործակալության փոխանցմամբ` Վրաստանի արտգործնախարար Թամար Բերուչաշվիլին երեկ Բրյուսելում հանդիպել է ՆԱՏՕ-ի գլխավոր քարտուղար Յենս Սթոլթենբերգի հետ, որի ժամանակ քննարկել է տարածաշրջանային անվտանգության հարցեր:
Հանդիպման ժամանակ ուշադրության կենտրոնում են գտնվել Վրաստանի համար առաջնահերթ հարցեր և հատկապես Աբխազիայի հանդեպ Ռուսաստանի գործողությունները:
Բերուչաշվիլին հանդիպումից հետո լրագրողների հետ զրույցում հայտարարել է, որ իրենք Ռուսաստանի ու Աբխազիայի միջև ստորագրված պայմանագիրը գնահատել են որպես բռնազավթման ուղղությամբ կոնկրետ քայլ, ինչը մարտահրավեր է եվրոպական ու եվրաատլանտյան անվտանգության համար:
Սթոլթենբերգն ընդգծել է, որ դա առաջին հերթին հակասում է այն սկզբունքներին, որոնց վրա հենված է դաշինքի շրջանակներում համագործակցությունը: Սթոլթենբերգը նաև ընդգծել է դաշինքի գործունեության շրջանակներում Վրաստանի հատուկ ներդրումը: Հանդիպման ժամանակ քննարկվել է նաև Վրաստանին ՆԱՏՕ-ի տրամադրած հատուկ փաթեթը:
