ՀԱԿ-ն ընդունո՞ւմ է ԲՀԿ-ի լիդերությունը քառյակում. «Ժամանակ»
«Ժամանակ»-ի զրուցակիցն է ԱԺ ՀԱԿ խմբակցության պատգամավոր Լյուդմիլա Սարգսյանը:
– Տիկին Սարգսյան, ԲՀԿ ներկայացուցիչը հայտարարեց, որ քառյակը դեմ է քվեարկելու 2013թ. բյուջեի կատարողականին, նախորդ անգամ էլ էլի ԲՀԿ ներկայացուցիչն էր ասում, որ Հովիկ Աբրահամյանի կառավարության ծրագրի քվեարկությանը քառյակը չի մասնակցելու: Մտավախություն չունե՞ք, որ ԲՀԿ-ն փորձում է ուղղորդել քառյակին:
– Գիտեք, ես էդպես չէի մեկնաբանի, որովհետև ես գիտեմ քննարկումների ընթացքի մասին, գիտեմ ամեն մեկի վերապահումները, մոտեցումները, պրոբլեմները: ԲՀԿ-ն, որպես առանձին քաղաքական միավոր, իր տեսակետն է արտահայտում, իսկ թե ինչու է այսօր այդ տեսակետը էլի ԲՀԿ կողմը ներկայացրել, որքան հասկացա այսօր ԲՀԿ-ում է տեղի ունեցել հանդիպումը, և ԲՀԿ-ն որպես քառյակին ընդունող տանտեր, ներկայացրել է իր մոտեցումները, և ես էդտեղ արտառոց բան չեմ տեսնում:
Ինչ վերաբերում է տպավորությանը, որ ԲՀԿ-ն քառյակին տանում է, ես չեմ կարծում, որ նման հնարավորություն կամ ցանկություն ԲՀԿ-ն ունի: Էդտեղ շատ տարբեր քաղաքական ուժեր են ձևավորված:
Առավել ևս ՀԱԿ-ում մի քանի կուսակցություններ են: Էդպես միակողմանի նայելը հարցին, կարծում եմ, ճիշտ չի, առավել ևս, որ մեզ մոտ բոլոր հարցերը քննարկվում են, մենք փոխհամաձայնեցնում ենք: Եթե համաձայն չենք, այդ մասին տեղյակ ենք պահում, որից հետո քառյակը նորից է հանդիպում և քննարկում արդեն ստեղծված վիճակը: Ինչ վերաբերում է կառավարության ծրագրի քվեարկությանը, էստեղ որևէ արտառոց բան չեմ տեսնում, որովհետև ես գտնում եմ, որ ավելի լավ է համատեղ չքվեարկենք, քան եթե կան մտավախություններ, որ տարբեր քվեարկություններ կլինեն…, քառյակը կարողանում է հասնել նրան, որ համատեղ որոշումներ կայացնելով համատեղ գործողություններ են իրականացնում:
– Իսկ չստացվե՞ց այնպես, որ Հովիկ Աբրահամյանի կառավարության ծրագրի քվեարկության ժամանակ որևէ քաղաքական ուժ դեմ չքվեարկեց ծրագրին՝ ԲՀԿ ուղղորդմամբ:
– Բացարձակ էդ կարծիքին չեմ: Չքվեարկելը նաև դեմ քվեարկություն կարելի է դիտարկել, որովհետև մինչ քվեարկելը ամեն խմբակցություն հայտնեց իր տեսակետը, որ մենք դեմ ենք կառավարության ներկայացրած ծրագրին:
Էսպես, թե էնպես, դեմ կարծիքն արտահայտվել է և չի նշանակում, որ մենք դրանով օժանդակել ենք: Մենք մեր նախնական հայտարարությունն արել էինք, որ մեզ համար ընդունելի չէ որևիցե ծրագիր, որ կներկայացնի կառավարությունը՝ չունենալով որևիցե հիմք այդ ծրագրին վստահելու: Իսկ ԲՀԿ-ն ունի բավական մեծ թվով պատգամավորներ, որոնք հավանաբար ունենում են նաև այլ կարգի մոտեցումներ, ինչը երևի թե ԲՀԿ-ի ներսում կարող է ինչ-որ խնդիրներ էլ առաջացնել:
Ես դա ընդամենը ենթադրում եմ: Եվ ԲՀԿ-ն չէր կարող երբևիցե ո՛չ ՀՅԴ-ին, ո՛չ «Ժառանգությանը», ո՛չ ՀԱԿ-ին պարտադրել կամ ուղղորդել, որ մենք իրենց հետ համատեղ բոյկոտեինք կառավարության ծրագիրը, եթե մենք էդ համաձայնության չգայինք:
– Սակայն այսօր փաստ է, որ ԲՀԿ-ն ու Դաշնակցությունը չեն ուզում, որ քառյակի համատեղ հանրահավաքը կայանա: Եվ իրենք դեմ են, որ Սերժ Սարգսյանի հրաժարականի պահանջ լինի, ուզում են, որ Հովիկ Աբրահամյանի կառավարությանը ժամանակ տրվի և այլն:
– Ես դա որպես փաստ չէի դիտարկի, որովհետև նման կարծիք երբևիցե չի հնչել: Կան մոտեցումների տարբերություններ. եթե մի կողմը կարծում է, որ պետք է հենց հիմա հանրահավաք անցկացնել, մյուս կողմը մտածում է, որ պետք է ամեն դեպքում օրակարգը ձևավորել նոր: Իսկ հավանաբար օրակարգի ձևավորումը պայմանավորված է կառավարության ծրագրի հաջողությամբ կամ ձախողումով: Մենք փորձում ենք ոչ թե անջատ, այլ համատեղ անել, և եթե էդ համատեղը կարող ենք անել մեկ երկու ամիս հետո, շատ ավելի լավ է համատեղ, քան առանձին-առանձին:
– Ասել է թե՝ ՀԱԿ-ը և քառյակի մյուս անդամները համաձայնե՞լ են, որ ավելի ուշ արվի հանրահավաքը, ԲՀԿ-ի պայմանները ընդունե՞լ եք:
– ԲՀԿ-ն երբևէ պայման չի դրել, որ մենք ընդունենք կամ չընդունենք: Եթե կարողանում ենք համաձայնության գալ, համատեղ ենք գործում, չենք կարողանում, անում ենք առանձին-առանձին: Եվ ՀԱԿ-ը, և մյուս քաղաքական ուժերը ամռան ընթացքում կունենան առանձին ծրագրեր, կիրականացնեն այդ ծրագրերը, չեն ունենա, ուրեմն համատեղ կիրականացնեն այն ժամկետի մեջ, որի շուրջ համաձայնության կգան:
Ամբողջությամբ կարդացեք «Ժամանակ»-ի այսօրվա համարում։
