Թուրքիայի, Վրաստանի ու Ադրբեջանի միջև գոյություն ունի բազմավեկտոր համագործակցություն. Գյուլ
Ադրբեջանական Trend լրատվական գործակալության փոխանցմամբ՝ Թուրքիայի նախագահ Աբդուլլահ Գյուլը Թբիլիսիում հայտարարել է, որ Թուրքիայի, Վրաստանի ու Ադրբեջանի միջև գոյություն ունի բազմավեկտոր համագործակցություն:
Գյուլը հիշեցրել է, որ երեք երկրների նախագահները Թբիլիսիում հանդիպել են 2007 թվականին՝ «Բաքու-Թբիլիսի-Կարս» (ԲԹԿ) երկաթուղու հիմնարկեքի արարողակարգին: Գյուլի խոսքերով՝ նախագահներից բացի, կանոնավոր շփման մեջ են երեք երկրների արտգործնախարարները:
Գյուլը հավելել է, որ այսօրվա հանդիպման ժամանակ քննարկելու են ԲԹԿ-ի, «Բաքու-Թբիլիսի-Ջեյհան» (ԲԹՋ) նավթամուղի, «Բաքու-Թբիլիսի-Էրզրում» (ԲԹԷ, Հարավկովկասյան) գազատարի և «Անդրանատոլիական» գազատարի (TANAP) հարցերը: Գյուլի խոսքերով՝ Թուրքիան, Վրաստանն ու Ադրբեջանն իրագործել են տարածաշրջանային ու միջազգային բազում նախագծեր:
