Համաշխարհային էներգետիկ շուկայում իրավիճակը շահեկան է դարձել Ադրբեջանի համար. Նատիգ Ալիև
Abc.az-ի փոխանցմամբ՝ Ադրբեջանի էներգետիկայի նախարար Նատիգ Ալիևը Caspian Energy Forum-ում հայտարարել է, որ համաշխարհային էներգետիկ շուկայում տիրող իրավիճակը շահեկան է դարձել Ադրբեջանի համար:
Նա ընդգծել է, որ փորձագետների կանխատեսմամբ մինչև 2030 թվականը լուրջ փոփոխություններ են սպասվում Եվրոպայի էներգետիկ կարիքների հարցում, քանի որ սպառվում են նրա առկա էներգոռեսուրսները:
Նախարարի խոսքերով՝ համաշխարհային շուկայում բարդ իրավիճակը սկսվեց Ռուսաստանի ու Ուկրաինայի միջև գազային պատերազմից, ինչը հանգեցրեց եվրոպական շուկայում ներկայիս իրավիճակի առաջացմանը. «Այդ ամենը հանգեցրեց նրան, որ Եվրոպան սկսել է փնտրել նոր աղբյուրներ ու ստեղծել նոր միջանցքներ:
Այդ պլանների իրագործման համար Ադրբեջանն ընտրվել է որպես ամենահուսալի գործընկեր՝ հաշվի առնելով ավելի վաղ ընտրված Իրանի ու Իրաքի քաղաքական իրադարձությունները: Կասպյան տարածաշրջանն այսօր սերտորեն աշխատում է եվրոպական շուկայի հետ:
Արդեն կարելի է ասել, որ ստեղծվել է միջանցք, որը սկսվում է Ադրբեջանում ու ավարտվում է Իտալիայում, և որի իրագործման համար պահանջվում է 50 միլիարդ դոլարի ներդրում: Այդ միջանցքն ադրբեջանական գազը կհասցնի եվրոպական շուկաներ»:
