Իրանը մտադիր է ավելացնել մինչև 5 տոկոս հարստացված ուրանի արտադրությունը. Սալեհի
![](https://168.am/wp-content/uploads/2013/11/628155432.jpg)
Իրանական Fars լրատվական գործակալության փոխանցմամբ՝ Իրանի ատոմային էներգիայի կազմակերպության ղեկավար Ալի Աքբար Սալեհին հայտարարել է, որ Իրանն իր միջուկային ծրագրի շուրջ «Վեցյակի» հետ համաձայնության գալուց հետո մտադիր է ավելացնել մինչև 5 տոկոս հարստացված ուրանի արտադրությունը.
«Մինչև 5 տոկոս հարստացված ուրանի արտադրությունը չի կրճատվի, ընդհակառակը՝ կմեծացվի: Սակայն մենք պարտավորվել ենք հետագա վեց ամիսներին ուրան չհարստացնել մինչև 20 տոկոս»:
Նշվում է, որ Իրանը, «Վեցյակի» հետ պայմանավորվածության համաձայն, պարտավորվել է իր տրամադրության տակ առկա մինչև 20 տոկոս հարստացված ուրանի կեսը թողնել օքսիդային վիճակում՝ որպես աշխատանքային պաշար՝ Թեհրանի հետազոտական ռեակտորի համար վառելիք արտադրելու նպատակով:
Մնացյալ մասը պետք է նվազեցվի մինչև 5 տոկոսի: Բացի այդ, Իրանը պարտավորվել է ուրանը չհարստացնել 5 տոկոսից ավելի: Սալեհին ընդգծել է, որ Իրանը «Վեցյակի» հետ համաձայնագիր ստորագրելու արդյունքում ոչինչ չի կորցրել, մինչդեռ պատժամիջոցների համակարգը «ցնցվել» է: Նա հավելել է, որ Իրանը միայն համաձայնվել է դադարեցնել մինչև 20 տոկոս ուրանի հարստացումը: