Պուտին․ Ռուսաստանի ռազմարդյունաբերական համալիրի արտահանման պատվերները գերազանցել են 70 մլրդ դոլարը
Ռուսաստանի ռազմարդյունաբերական համալիրում հատուկ ռազմական գործողության մեկնարկից ի վեր խոցման միջոցների և զինամթերքի արտադրությունն աճել է 22 անգամ։ Այս մասին հայտարարել է Ռուսաստանի նախագահ Վլադիմիր Պուտինը՝ Կրեմլում պաշտպանական արդյունաբերության ոլորտի վաստակաշատ աշխատակիցներին պետական պարգևներ հանձնելու արարողության ժամանակ։
Պուտինի խոսքով՝ վերջին տարիներին տասնյակ անգամ աճել է նաև անօդաչու թռչող սարքերի արտադրությունը, և դրանք անխափան մատակարարվում են զինված ուժերին:
Ռուսաստանի նախագահի ներկայացմամբ՝ հատուկ ռազմական գործողության մեկնարկից ի վեր Ռուսաստանի զինված ուժերին ռադիոլոկացիոն կայանների մատակարարումներն աճել են գրեթե հինգ անգամ, իսկ զրահատեխնիկայի և զրահապատ սպառազինության մատակարարումները՝ 2,5 անգամ։
Պուտինը նշել է, որ ռազմարդյունաբերական համալիրի արտադրանքը նախատեսված է ոչ միայն ռազմաճակատի համար։ Նրա խոսքով՝ ամբողջությամբ ապահովվում են զինված ուժերի և ուժային բոլոր կառույցների կարիքները։
ՌԴ նախագահը նաև հաղորդել է՝ Ռուսաստանի ռազմարդյունաբերական համալիրի արտահանման պատվերների փաթեթը գերազանցել է 70 միլիարդ դոլարը։
Նրա խոսքով՝ Ռուսաստանը վստահորեն պահպանում է իր դիրքերը սպառազինության համաշխարհային շուկայի առաջատար երկրների շարքում։
