Էկոնոմիկայի նախարարությունը շուրջ 250 միլիոն դրամի դաբաղի պատվաստանյութ կստանա ՌԴ-ից

Էկոնոմիկայի նախարարությունը ձեռք է բերել անասնաբուժության մեջ կիրառվող կենդանիների դաբաղ հիվանդության նկատմամբ ակտիվազրկված պատվաստանյութ դաբաղի SAT-1/I տիպի դեմ՝ «SAT-1/I/Кения/2017»։

Հրատապ մեկ անձ գնման ընթացակարգով այդ գնումը կատարվել է օրերս․ ՀՀ էկոնոմիկայի նախարարության և ՌԴ Դաշնային ծառայության ենթակայության տակ գտնվող Կենդանիների առողջության պահպանման դաշնային կենտրոնի՝ ВНИИЖ-ի միջև կնքված պայմանագրի գինը, ըստ էլեկտրոնային գնումների համակարգի, կազմել է 253 միլիոն 556.446 դրամ, պայմանագրում նշվում է 48.764 047.20 դրամ։

Մատակարարման ժամկետ է նշվել սեպտեմբերի 16-ը։

Ավելի վաղ մամուլը տեղեկացրել էր Շիրակի մարզում արձանագրված դաբաղի դեպքերի մասին․ մի քանի անասնատերերի վարկածով դաբաղը հարևան Թուրքիայից էր տարածվել:

Դեռ նախորդ տարեվերջին էլ տեղեկացրել էինք, որ Կառավարությունը որոշել է հակադաբաղային պատվաստանյութերի ձեռքբերումն իրականացնել ուղիղ արտադրողից՝ ՌԴ-ի «Կենդանիների առողջության պահպանման դաշնային կենտրոն» հաստատությունից, մեկ անձից գնման եղանակով։

«Կենդանիների առողջության պահպանման դաշնային կենտրոնի» կողմից առաջարկվել էր 1 մլ համար 143.63 դրամ /100 մլ՝ 50 դոզա/ գինը (պատվաստանյութի ներմուծման ժամանակ ԱԱՀ-ի պարտավորությունն էլ համապատասխանաբար բաշխվում է 1 մլ արժեքի համար 172.4 դրամ):

Կառավարությունը 2025 թվականին 3.496.300 մլ պատվաստանյութ ձեռք բերելու համար անհրաժեշտ ֆինանսական միջոցներ էր նախատեսել 602.608.283 ՀՀ դրամի չափով՝ ներառյալ ԱԱՀ-ն։ Նշվում էր նաև, որ գինը չի ներառում Երևանի օդանավակայանից մինչև մատակարարման վայր տեղափոխելու ծախսերը՝ ապահովագրավճարը՝ մոտ 3.000.000 ՀՀ դրամի չափով, տեղափոխումը՝ մոտ 40.000 ՀՀ դրամի չափով, և բանվորական ուժը՝ մոտ 45.000 ՀՀ դրամի չափով։ Այս հաշվարկով պատվաստանյութի ձեռքբերման համար անհրաժեշտ գումար էր նշվել 605.693.283 ՀՀ դրամը։