Տարբեր երկրների ղեկավարներ ցավակցություններ են հայտնել Հնդկաստանին ավիաաղետի կապակցությամբ
Աշխարհի տարբեր երկրների բարձրաստիճան պաշտոնյաներ ցավակցություններ են հայտնել Հնդկաստանին տեղի ունեցած ավիաաղետի կապակցությամբ։ Այս մասին հայտնում է Reuters-ը։
Ողբերգությանն արձագանքել է Ֆրանսիայի նախագահ Էմանուել Մակրոնը։
«Խորը ցավով տեղեկացանք Ահմեդաբադում (Հնդկաստան) տեղի ունեցած ինքնաթիռի ողբերգական վթարի մասին։ Այս վշտի պահին իմ անկեղծ մտքերն եմ հայտնում զոհերի սիրելիներին և վարչապետ Նարենդրա Մոդիին», – նշել է Մակրոնը։
Մեծ Բրիտանիայի թագավոր Չարլզ 3-րդը հայտարարություն է տարածել՝ նշելով, որ ցնցված է Ահմեդաբադում տեղի ունեցած «սարսափելի իրադարձություններից»։
Թագավորը ցավակցություն է հայտնել զոհերի հարազատներին և ընկերներին ու հարգանքի խոսքեր ասել արտակարգ ծառայություններին և աջակցություն տրամադրող բոլոր անձանց։
Ուկրաինայի նախագահ Վոլոդիմիր Զելենսկին նույնպես ցավակցություն է հայտնել հնդիկ ժողովրդին։
«Սարսափելի լուր Հնդկաստանում ուղևորատար ինքնաթիռի վթարի մասին։ Այս ողբերգական օրն իմ խորին ցավակցություններն եմ հայտնում վարչապետ Մոդիին և Հնդկաստանի ողջ ժողովրդին։ Մեր մտքերը Հնդկաստանում, Մեծ Բրիտանիայում, Պորտուգալիայում և Կանադայում բոլոր զոհերի հարազատների և մտերիմների հետ են», – ասել է Զելենսկին։
Կանադայի վարչապետ Մարկ Քարնին X-ի իր էջում գրառում է կատարել ինքնաթիռի վթարի մասին։
«Խորը ցնցումով տեղեկացա Ահմեդաբադում Լոնդոն թռչող Air India ավիաընկերության ինքնաթիռի կործանման մասին, որը 242 ուղևոր էր տեղափոխում, այդ թվում՝ մեկ կանադացի։ Իմ մտքերը բոլոր ուղևորների սիրելիների հետ են։ Կանադայի տրանսպորտի հարցերով պաշտոնյաները սերտ կապի մեջ են գործընկերների հետ, և ես պարբերաբար թարմացումներ եմ ստանում ողբերգության առնչությամբ», – նշել է նա։
Ցավակցական խոսքերով հանդես են եկել նաև Ռուսաստանի նախագահը, Պորտուգալիայի, Ավստրալիայի, Իտալիայի, Սինգապուրի և Չեխիայի վարչապետները։ՀՀ վարչապետ Նիկոլ Փաշինյանը նույնպես ցավակցել է Հնդկաստանի վարչապետին ու բարեկամ ժողովրդին՝ ինքնաթիռի ողբերգական ավիավթարի կապակցությամբ: ՀՀ արտաքին գործերի նախարար Արարատ Միրզոյանը ցավակցություն է հայտնել Հնդկաստանի արտգործնախարար Սուբրամանյամ Ջայշանկարին և Հնդկաստանի բարեկամ ժողովրդին։
Ըստ Indian Express-ի՝ Ահմեդաբադում Air India ինքնաթիռի կործանման հետևանքով զոհվել են օդանավում գտնվող բոլոր 230 ուղևորները և անձնակազմի 12 անդամները։
Ըստ ավիաընկերության՝ ինքնաթիռում գտնվող ուղևորների թվում էին 169 հնդիկ, 53 բրիտանացի, 7 պորտուգալացի, 1 կանադացի։
Օդանավն Ահմեդաբադից վերելք է կատարել տեղական ժամանակով 13։38-ին և ուղղություն վերցրել դեպի Լոնդոնի Գեթվիք օդանավակայան, ուր պետք է ժամաներ տեղական ժամանակով 18։25-ին։ Րոպեներ անց ինքնաթիռը կործանվել է։
