ՌԴ-ում միգրանտ երեխաներին առանց ռուսաց լեզվի իմացության չեն ընդունի դպրոց
ՌԴ Պետդուման լիագումար նիստում երկրորդ և երրորդ՝ վերջնական ընթերցմամբ ընդունել է օրինագիծ, որով արգելվում է ռուսական դպրոցներ ընդունել այն միգրանտ երեխաներին, որոնք ռուսերեն չգիտեն: Փաստաթղթին կողմ է քվեարկել 409 պատգամավոր, դեմ՝ մեկը, ձեռնպահ չի եղել, հայտնում է ՏԱՍՍ-ը:
Նախաձեռնությունը Պետդումա են ներկայացրել բոլոր հինգ խմբակցությունների մի խումբ պատգամավորներ՝ խոսնակ Վյաչեսլավ Վոլոդինի և փոխխոսնակ Իրինա Յարովայի գլխավորությամբ. վերջինս ղեկավարում է Պետդումայի միգրացիոն քաղաքականության հանձնաժողովը։
Ընդունված օրենքի համաձայն՝ օտարերկրյա քաղաքացիները կընդունվեն հիմնական հանրակրթական դպրոցներ՝ Ռուսաստանի Դաշնության տարածքում նրանց գտնվելու օրինականությունը հաստատող փաստաթղթի ներկայացմամբ։ Միևնույն ժամանակ, դպրոց ընդունվելու համար անհրաժեշտ կլինի հաջողությամբ հանձնել ռուսաց լեզվի իմացության թեստ:
Թեստավորումը կիրականացվի անվճար։
«Այն անձանց, որոնք չեն անցել նախնական ընդհանուր, հիմնական ընդհանուր և միջնակարգ հանրակրթական կրթական ծրագրերի ուսումնասիրման համար բավարար չափով ռուսաց լեզվի իմացության թեստավորում, չի թույլատրվի յուրացնել այդ կրթական ծրագրերը»,- ասված է տեքստում:
Նոր կանոններն ուժի մեջ կմտնեն 2025 թվականի ապրիլի 1-ից։
