Հութիների հարձակման հետևանքով Եմենում կա չորս զոհ

Եմենը հայտարարել է, որ Իրանի կողմից աջակցվող հութիները ուրբաթ օրը վեց բալիստիկ հրթիռ են արձակել Կարմիր ծովի ափին գտնվող Մոչա նավահանգստի ուղղությամբ, ինչի հետևանքով առնվազն չորս խաղաղ բնակիչ է զոհվել, հայտնում է Reuters-ը։

Հութիների և Սաուդյան Արաբիայի աջակցությունը վայելող կառավարության միջև ռազմական գործողությունների սրումը տեղի է ունենում տարածաշրջանում լարվածության աճի ֆոնին՝ կապված ԱՄՆ-ի և Իսրայելի կողմից Իրանի դեմ պատերազմի հետ։

Եմենի զինված ուժերը հայտարարության մեջ նշել են, որ հութիների հարձակման թիրախում են եղել քաղաքացիական օբյեկտ, ինչպես նաև տնտեսական և ծովային ենթակառուցվածքներ։ Երկու մարդ համարվում է անհետ կորած, ութ հոգի վիրավորվել է։

Հութիները հայտարարել են, որ հարվածել են Մոչայում Սաուդյան Արաբիայի աջակցությունը վայելող ուժերի և «վարձկանների» կողմից զենքի ու ռազմանավերի կուտակման վայրին՝ ոչնչացնելով նավեր և զենքեր։