Իրանի նախագահը ժամանել է Շրի Լանկա
Իրանի նախագահ Էբրահիմ Ռայիսին ժամանել է Շրի Լանկա, որպեսզի մասնակցի Թեհրանի կողմից ֆինանսավորված խոշոր նախագծի բացման արարողությանը։ Այս մասին հաղորդում է Tasnim լրատվական գործակալությունը։
«Մեկօրյա այցի ընթացքում Իրանի նախագահը պաշտոնապես կբացի «Ումա Օյա» հիդրոէներգետիկ համալիրը՝ մեգանախագիծ, որը ֆինանսավորվել է Իրանի կառավարության կողմից», – նշված է հրապարակման մեջ։
Բացի այդ, Ռայիսին կհյուրընկալվի Շրի Լանկայի տնտեսական և մշակութային գլխավոր կենտրոն հանդիսացող Կոլոմբո քաղաքում գտնվող նախագահական պալատում, կմասնակցի Իրանի և Շրի Լանկայի բարձրաստիճան պատվիրակությունների միջև կայանալիք հանդիպմանը, կստորագրի համագործակցության մի շարք փաստաթղթեր, ինչպես նաև կմասնակցի մամուլի ասուլիսի։
Շրի Լանկայից առաջ Ռայիսին պետական այցով Պակիստանում էր, որտեղ հանդիպումներ է ունեցել երկրի բարձրաստիճան քաղաքական, ռազմական և կրոնական ղեկավարների հետ, ինչպես նաև ստորագրել է համագործակցության 8 համաձայնագիր։
