Չավուշօղլուն հեռախոսազրույց է ունեցել Սերբիայի և Կոսովոյի արտգործնախարարների հետ
Թուրքիայի արտաքին գործերի նախարար Մևլութ Չավուշօղլուն առանձին հեռախոսազրույցներ է ունեցել Սերբիայի արտգործնախարար Նիկոլա Սելակովիչի և Կոսովոյի արտաքին գործերի նախարար Դոնիկա Գերվալլա Շվարցի հետ։ Այս մասին տեղեկացնում է ermenihaber.am-ը։
Թուրք նախարարը, ըստ երկրի գլխավոր արտաքին գերատեսչության տրամադրած տեղեկությունների, Սերբիայի և Կոսովոյի սահմանին լարվածության պատճառով առանձին հեռախոսազրույցներ է ունեցել իր սերբ գործընկեր Սելակովիչի և Կոսովոյի գործընկեր Շվարցի հետ։
Հեռախոսազրույցների ընթացքում Չավուշօղլուն հայտնել է, որ Թուրքիան միշտ կարևորում է Բալկաններում խաղաղությունն ու կայունությունը ու շեշտել, որ տարածաշրջանում նոր լարվածությունը ոչ մեկին ձեռնտու չէ։
Նա նշել է նաև, որ Թուրքիան պատրաստ է լարվածությունը նվազեցնելու համար քայլեր ձեռնարկել։
