Երբ աթոռն ու իշխանությունն ավելի թանկ են, քան հայրենիքն ու տղաների կյանքը
Արցախն անընդունելի է համարում որևէ այլ կարգավիճակ, բացի ինքնորոշումից։ Հայաստան-Ադրբեջան չակերտավոր խաղաղության օրակարգով Արցախն Ադրբեջանին բռնակցելու ցանկացած բանակցային գործընթաց ինքնին, ինչպես նաև դրանից բխող փաստաթղթի ստորագրումը, տապալում է ոչ միայն Արցախի պետականությունը, այլև արցախահայության՝ իր պատմական հայրենիքում ապրելու անքակտելի իրավունքը։
Սա Արցախի հստակ դիրքորոշումն է՝ ի պատասխան Հայաստանի գործող ղեկավարի՝ վերջին օրերին արված կասկածելի հայտարարությունների։
Արցախի փրկության մասին հոգու ճիչ հիշեցնող հայտարարության դրդապատճառը, թերևս, Հայաստանի Ազգային ժողովում Կառավարության հաշվետվությունը ներկայացնելու պատրվակով Արցախի մասին Փաշինյանի հնչեցրած զեկույցն էր, իշխանական պատգամավորների քաղաքական հայտարարություններն ու ելույթները։ Քաղաքական նեղ շահերով առաջնորդվող իշխանությունն ու դրա ղեկավարը մի շարք հայտարարություններով ու ինքնախոստովանական ցուցմունք-ելույթներով, ըստ էության, զգուշացրին հայ հանրությանը, որ Արցախի հարցում վտանգավոր ու ճակատագրական լուծումներ են սպասվում:
