Հայաստանն ու Եվրամիությունը ստորագրեցին վիզայի դյուրացման համաձայնագիրը
Եվրամիությունն ու Հայաստանը Բրյուսելում ստորագրել են մուտքի արտոնագրերի դյուրացման համաձայնագիրը: Դեկտեմբերի 17-ին ստորագրման արարողությանը Եվրամիության կողմից մասնակցել է Կիպրոսի արտաքին գործերի նախարար Էրատո Կոզակու-Մարկուլիսը` որպես Եվրամիության խորհրդի նախագահ, ԵՄ Ներքին գործերի հանձնակատար Սեսիլիա Մալմսթրոմը, Հայաստանի կողմից` ՀՀ արտաքին գործերի նախարար Էդվարդ Նալբանդյանը: Ինչպես Արմենպրես-ին տեղեկացրին Եվրամիության խորհրդի լրատվական ծառայությունից, համաձայնագիրը կուղարկվի Եվրախորհրդարան` ներքին ընթացակարգերի ու ամբողջացման համար: Երբ երկու կողմերը հայտարարեն, որ բոլոր ներքին ընթացակարգերը սպառված են, այդ հայտարարությանը հաջորդող ամսվա առաջին օրը համաձայնագիրն ուժի մեջ կմտնի, բայց ոչ ավելի վաղ, քան ռեադմիսիայի համաձայանգրի ուժի մեջ մտնելը: Երկու համաձայանգրերը պետք է ուժի մեջ մտնեն միաժամանակ: Միացյալ Թագավորությունը, Իռլանդիան ու Դանիան համաձայնագրի մաս չեն կազմում:
Համաձայնագիրը Հայաստանի քաղաքացիների համար, մասնավորապես նրանց, ովքեր հաճախ են ճանապարհորդում, ավելի դյուրին ու մատչելի է դարձնում Եվրամիության երկրներ ճանապարհորդությունը կարճաժամկետ արտոնագրերով` հնարավորություն տալով 90 օրվա փոխարեն ճանապարհորդել 180 օր:
Համաձայնագրերը վավերացման փուլ կմտնեն 2013թ. առաջին կեսին: Մուտքի վիզաների դյուրացման համաձայնագրով ՀՀ քաղաքացիների համար նախատեսվում են Շենգենյան գոտու երկրներ մուտքի վիզաներ ստանալու դյուրացված ընթացակարգեր: ԵՄ երկրներ պարզեցված մուտք է նախատեսվում մի շարք կատեգորիաների ՀՀ քաղաքացիների համար, մասնավորապես` պաշտոնական պատվիրակության անդամների, գիտնականների, ուսանողների, լրագրողների, սպորտի և արվեստի գործիչների, ԵՄ երկրներում օրինական բնակություն ունեցողների մերձավոր ազգականների, ԵՄ երկրներում գործող հայկական սփյուռքի կառույցների կողմից կազմակերպվող միջոցառումների մասնակիցների, և այլոց համար: Նախատեսվում է նաև նվազեցնել Շենգենյան մուտքի արտոնագրի գինը` դարձնելով 35 եվրո, ինչպես նաև այն դարձնել անվճար մի շարք կատեգորիաների քաղաքացիների, այդ թվում` երեխաների ու թոշակառուների համար:
ԵՄ հետ մուտքի վիզաների դյուրացման և հետընդունման համաձայնագրերի շուրջ բանակցությունները մեկնարկել էին 2012թ. փետրվարին Երևանում:
