Մխիթար Զաքարյանի կալանավորման վերաբերյալ որոշումը կհրապարակվի ժամը 20:00-ին
Երևան քաղաքի ընդհանուր իրավասության դատարանը (Ավան նստավայր)՝ դատավոր Վահե Միսակյանի նախագահությամբ, ավելի քան 3 ժամ տևողությունից հետո ավարտվեց Քննչական կոմիտեի՝ Մեղրի խոշորացված համայնքի համայնքապետ Մխիթար Զաքարյանի նկատմամբ խափանման միջոց կալանավորում կիրաելու վերաբերյալ ներկայացրած միջնորդության քննությունը:
Մխիթար Զաքարյանին երեկ է մեղադրանք առաջադրվել ապրիլի 21-ին Մեղրիում և Ագաակում տեղի ունեցած դեպքերի գործով, որը Քննչական կոմիտեն որակում է որպես խուլիգանություն: ՔԿ-ի երեկ տարածած հաղորդագրության համաձայն՝ Սյունիքում ապրիլի 21-ին կատարված դեպքերի գործով մեղադրանք է առաջադրվել 19 անձի, որոնցից 9-ին՝ ՀՀ քրեական օրենսգրքի 258-րդ հոդվածի 3-րդ, 10-ին՝ 258-րդ հոդվածի 1-ին մասի հատկանիշներով: Մեղադրյալներից 8-ի նկատմամբ խափանման միջոցը կալանավորում ընտրելու համար միջնորդություններ են ներկայացվել դատարան:
Զաքարյանին ձերբակալել էին ապրիլի 22-ին Քննչական կամիտեում՝ այն բանից հետո, երբ ոստիկանները ապրիլի 21-ի լույս 22-ի գիշերը նախ վերջինիս հրավիրել էին Ոստիկանության Մեղրիի, ապա Կապանի բաժին, հետո հայտնել, որ պետք է տեղափոխեն Երևան, ու ժամեր անց միայն ձերբակալել էին: Երեկ Ընդհանուր իրավասության դատարանը Մխիթար Զաքարյանի ձերբակալումը ճանաչել էր ոչ իրավաչափ:
Դատարանի որոշումը կհրապարակվի այսօր՝ ժամը 20։00-ին:
