Սահմանների ճշգրտման հարցում այսօր Հայաստանի իշխանության մասնակցությունը զրոյականի է հասել․ Գագիկ Մինասյան
«Այսօր տեսնում ենք խայտառակ մի բան. մեր քաղաքացիները գերի ընկած զինվորների ազատ արձակման կամ փոխանակման առումով դիմում են ոչ թե հայկական իշխանության ներկայացուցիչներին կամ ինստիտուտներին, այլ օտարերկրյա դեսպանատներին: Սա ուղղակի ասում է, որ մեզ մոտ այսօր քաղաքական ինստիտուտները ոչնչացված են»,- լրագրողների հետ հանդիպման ժամանակ ասաց ՀՀԿ անդամ Գագիկ Մինասյանը:
Բանախոսը շեշտեց. «Պետությունն առաջինը պետական ինստիտուտներն են, և դրանց ոչնչացումն այս 2.5 տարվա ընթացքում Նիկոլ Փաշինյանի կողմից իրականացված ազգակործան, պետականակործան քաղաքականության արդյունք է: Եվ այդ արդյունքը, ցավոք, տեսնում են ոչ միայն մեր քաղաքացիները, այլև միջազգային հանրությունը: Այսօր ՀՀ-ում ըստ էության իշխանություն չկա, այն վերացել է՝ 2.5 տարվա հետևողական աշխատանքի արդյունքում: Եվ այս պարագայում Նիկոլ Փաշինյանի՝ իշխանությունից օր առաջ հեռացումը մեր ողբերգությունների կասեցման հիմնական նախապայմանն է, որովհետև այս ղեկավարի օրոք որևէ դրական հանգրվանի չենք կարող հասնել: Մեր պրոբլեմները խորանալու են, և ես հեռու եմ այն մտքից, որ խնդիրները սահմանափակվեցին միայն այն բանով, երբ նա ստորագրեց կապիտուլյացիայի այդ խայտառակ հայտարարությունը: Մենք դեռ լրջագույն պրոբլեմներ ունենք՝ կապված Սյունիքի մարզում իրականացվող այդ ծրագրերի հետ, որը ևս նախատեսված է այդ հայտարարության մեջ: Պետք է Նախիջևանը կապվի Ադրբեջանի հետ, և այս խնդիրների քիչ թե շատ հայանպաստ լուծումը ենթադրում է Նիկոլ Փաշինյանի օր առաջ հեռացումը իշխանությունից, և վարչապետ ընտրելը մի մարդու, ով կկարողանա այս ծանր իրավիճակը շտկել»:
ՀՀԿ անդամը ցավով նշեց՝ սահմանների ճշգրտման հարցում այսօր Հայաստանի իշխանության մասնակցությունը զրոյականի է հասել:
«Արցախի մասին համաշխարհային հանրությանը ինֆորմացիա է տալիս ռուսական խաղաղապահ ուժի ներկայացուցիչը: Կարծես թե Հայաստանն իսպառ դուրս է մղվել ղարաբաղյան գործընթացից: Սա մի անթույլատրելի և խայտառակ իրավիճակ է, որը ստորացուցիչ է ցանկացած հայի համար՝ կլինի նա ՀՀ-ի, Արցախի բնակիչ, թե աշխարհի որևէ երկրի: Եվ այս իրավիճակը իր հետևանքներն ունենալու է: Մեր անկախության սերունդը չի կարող հանդուրժել, որ իր հայրենիքում իր իշխանությունները վերջնական լուծումների տերը չեն: Մեր անկախության սերունդը, կարծում եմ, պետք է թոթափի իր ուսերից այս իշխանությանը և բերի նոր իշխանություն, որը կկարողանա այս ծանր իրավիճակից մեր ժողովրդին ու պետությանը դուրս հանել: Որքան շուտ կարողանանք իրականացնել Նիկոլ Փաշինյանի հեռացումը, այնքան հեշտ կլինի փրկել պետականության, ինքնության այն փշուրները, որոնք մնացել են այս ավերածությունից հետո, ու դրա վրա կամաց-կամաց վերականգնենք այն, ինչին արժանի է մեր պետությունը և ժողովուրդը»:
Գագիկ Մինասյանի դիտարկմամբ՝ այս խնդիրներն իրենց անխուսափելի ազդեցությունն են ունենալու նաև տնտեսական զարգացումների վրա:
«Դուք չեք կարող այստեղ ներդրումներ բերել, դարձել է ձախողված մի երկիր, և դրսևորումները սոցիալական, տնտեսական առումներով ևս անխուսափելի են: Միայն Փաշինյանի օր առաջ, ժամ առաջ հեռացումը մեզ կարող է փրկել էլ ավելի մեծ կորուստներից: Բավական է ասել այն նախարարների մասին, որոնք եկել են վերջին 10 օրվա ընթացքում: Յուրաքանչյուրի ցանկացած արտահայտություն խոսում է այն մասին, որ այստեղ պետություն չէ: Այդ նորանշանակ նախարարներն աբսուրդային հայտարարություններ են անում, որոնք խոսում են այն մասին, որ գործ ունենք պետության իսպառ բացակայության հետ, և դրա մեղավորը մեկն է՝ Նիկոլ Փաշինյանը: Բոլոր բնագավառներում՝ պաշտպանությունից մինչև մշակույթ, գիտությունից մինչև առողջապահություն, բոլոր ձախողումների պատճառը այդ մեկ մարդն էր, ով իր գալով՝ չարիքի պես գուժեց մեր պետության այս ողբերգությունը»,- եզրափակեց ՀՀԿ անդամը:
