«Դոմոդեդովո»-ում գիշերող ՀՀ քաղաքացիները տեղափոխվել են կացարաններ
Մոսկվայի «Դոմոդեդովո» օդանավակայանում օրեր շարունակ գիշերող ՀՀ քաղաքացիները ՌԴ-ում ՀՀ դեսպանատան աջակցությամբ երեկ տեղափոխվել են կացարաններ և այնտեղ ապրող իրենց հարազատների բնակարաններ։
Հիշեցնենք, օդանավակայանում սպասողների մի մասը վերադարձել է, մյուսները՝ հերթագրվել են նոր թռիչքի համար:
«Երեկ դեսպանատունը օդանավակայանից ավելի քան 20 հոգու նույնպես ապահովեց կացարանով և սննդով, և ժամը 23:30-ի տվյալներով մնացել էին երկու հոգի, որոնց տեղավորման հարցը լուծեցին մենք՝ «Ապավեն» բարեսիրական շարժման շրջանակներում»,-168.am-ի հետ զրույցում տեղեկացրեց ՀՅԴ Հայ Դատի Մոսկվայի գրասենյակի ղեկավար Ներսես Ներսեսյանը:
Մեր զրուցակիցը նշեց, որ իրենց թռիչքին սպասող մեր հայրենակիցների շրջանում կա անորոշություն, ինչն իր հերթին առաջացնում է խուճապ և ագրեսիա.
«Այս պահին օդանավակայանի անվտանգությունը թույլ չի տալիս կուտակումներ, ուղղակի դուրս են հրավիրում տարածքից։ Թեև հոսքը մշտապես կա, քանի որ հազարավոր հայեր մնացել են առանց աշխատանքի, նրանցից շատերի ապագան Ռուսաստանում վտանգված է և միակ հույսը Հայաստան վերադառնալն է։ Այս պահին թռիչքի վերաբերյալ ոչ մի տեղեկություն չունենք, թեև ակնկալում ենք, որ առաջիկա օրերին սպասվում են գոնե մեկ֊երկու թռիչքներ»:
Մենք կապ հաստատեցինք նաև օդանավակայանից կացարան տեղափոխված Աբել Թաիրյանի հետ: Նա մասնավորապես տեղեկացրեց, որ ապրիլի 16-ից մինչև ապրիլի 21-ը եղել է օդանավակայանում.
«Օդականավակայանում էինք, մինչև եկան վերջնական հանեցին: Դեսպանատունն ու դաշնակներն են աջակցել»:
Ա. Թաիրյանը հավելեց, որ դեռ չգիտեն թռիչքի կոնկրետ օրը, բայց իրենց վստահեցրել են, որ այդ ուղղությամբ աշխատում են:
Մեր տեղեկություններով՝ ՀՀ քաղաքացիներին կացարաններում տեղավորելու և այլ հարցերով աջակցել է նաև հայազգի գործարար Սամվել Կարապետյանը:
