Գումարի պակասի պատճառով պետպատվերով վիրահատությունների հերթագրում չի լինի. Արսեն Թորոսյան
ՀՀ առողջապահության նախարարությունը բուժհաստատություններին տալիս է բավարար չափով գումար, որ երեխաների համար պետպատվերով վիրահատությունների հերթագրում չլինի, բժիշկները պացիենտից հավելյալ գումար չակնկալեն: Այս մասին ՀՀ վարչապետ Նիկոլ Փաշինյանի հետ աշխատանքային քննարկման ժամանակ հայտարարեց նախարար Արսեն Թորոսյանը:
Վարչապետը հետաքրքրվեց երեխաների հիվանդանոցային բուժման մասին, ինչին ի պատասխան Արսեն Թորոսյանը նշեց, որ կա երկու սցենար: Պլանային վիրահատության դեպքում, երբ, օրինակ, 9 տարեկան երեխայի բուժումը չի տվել ցանկալի արդյունք, կա վիրահատության կարիք, տեղամասային պոլիկլինիկայի մանկաբույժը տալիս է պետական պատվերով ուղեգիր:
«Այդ ուղեգրով մոտենալու են հիվանդանոցի ընդունարան: Եվ մեր այս պահի բյուջետային հատկացումները թույլ են տալիս, որ հերթագրումը տեղի ունենա միայն բժիշկների ֆիզիկական ծանրաբեռնվածության հետևանքով: Գումարի պակասի պատճառով հերթագրում չի լինելու»,- վստահեցրեց Թորոսյանը:
Նիկոլ Փաշինյանի նշեց, թե տասնյակ դեպքեր են լինում, երբ անձը պետպատվերով պետք է բուժվի, հերթագրվում է, սակայն ծառայությունը չի մատուցվում, քանի որ ասում են, թե պետպատվերի գումարը վերջացել է:
Թորոսյանը հավաստիացրեց, որ այդ մասով նման խնդիր չկա: Մնացած ծառայությունների մասով էլ էական բարելավում ունեն: «Մենք բուժհաստատություններին այնքան բավարար ֆինանսավորում ենք տալիս, որպեսզի հավելյալ եկամուտ չակնկալեն պացիենտներից, ակնկալելու դեպքում պատրաստ ենք արագ արձագանքել»,-նշեց նախարարը:
Փաշինյանը հետաքրքրվեց, թե պացիենտը արդյո՞ք իր գումարով դեղ ևս չպետք է առնի, Թորոսյանն ասաց՝ հիվանդանոցում՝ ոչ:
