Թուրքական 4 ռազմարդյունաբերական ընկերություններ հայտնվել են «Defense News Top 100» ցանկում
Ամերիկյան «Defense News» կայքը հրապարակել է աշխարհի առաջատար 100 ռազմարդյունաբերական ընկերությունների ցանկը: Այն կազմվել է նախորդ տարի ռազմարդյունաբերական արտադրանքի վաճառքի ծավալների հիման վրա: Այս մասին տեղեկացնում ermenihaber.am-ը:
Ցանկում ընդգրկվել են նաև 4 թուրքական ռազմարդյունաբերական ընկերություններ, որոնք են՝ «Aselsan»-ը, «STM»-ն, «Roketsan»-ը և «Tusaş»-ը:
«Aselsan»-ը, որը 2006թ. ցանկի 93-րդ հորիզոնականում էր, իսկ նախորդ տարի՝ 55-րդ տեղում, այս տարի գրավել է 52-րդ հորիզոնականը: Այս ընկերությունը 2017թ. ապահովել էր 1 մլրդ 424 մլն դոլարի առևտրաշրջանառություն: Այդ ցուցանիշը 2018թ. աճել է 26 տոկոսով՝ կազմելով 1 մլրդ 792 մլն դոլար:
2011թ. առաջին անգամ աշխարհի 100 առաջատար ռազմարդյունաբերական ընկերությունների ցանկում ընդգրկված և 83-րդ տեղում հայտնված «TUSAŞ»-ը այս տարի հասել է ցանկի 69-րդ հորիզոնականին: 2017թ. ընկերությունը ապահովել էր 1 մլրդ 89 մլն դոլարի առևտրաշրջանառություն, ինչը 2018թ. նվազել է 4 տոկոսով՝ կազմելով 1 մլրդ 50 մլն դոլար: «TUSAŞ»-ը նախորդ տարի ցանկի 64-րդ հորիզոնականում էր:
«STM» ռազմարդյունաբերական ընկերությունը առաջին անգամ «Defense News»-ի ցանկում հայտնվել էր անցյալ տարի՝ 97-րդ հորիզոնականով: Այս տարի ընկերությունը բարձրացել է 12 կետով՝ հասնելով 85-րդ հորիզոնականին: «STM»-ի առևտրաշրջանառությունը 2018թ. նախորդ տարվա համեմատ ավելացել է 53 տոկոսով՝ կազմելով 564 մլն դոլար:
Իսկ «Roketsan» ռազմարդյունաբերական ընկերությունը առաջին անգամ նշված ցանկում ընդգրկվելիս գրավել էր 98-րդ տեղը: 2017թ. ընկերությունն 96-րդն էր, իսկ 2018թ.՝ արդեն 89-րդը: 2017թ. 376 մլն դոլարի առևտրաշրջանառություն ապահոված «Roketsan»-ը 2018թ. ավելացրել է իր այդ ցուցանիշը 36 տոկոսով՝ հասցնելով այն 522 մլն դոլարի:
