Ինչո՞ւ Հարկային օրենսգրքի փոփոխությունների փաթեթը չի հասնում Ազգային ժողով
Ինչո՞ւ Հարկային օրենսգրքի փոփոխությունների փաթեթն այսքան երկար ժամանակ չի հասնում Ազգային ժողով: Այս մասին այսօր ԱԺ Տնտեսական հարցերի մշտական հանձնաժողովի նիստում 2018թ. կառավարության ծրագրի կատարողականի քննարկման ժամանակ հարցրեց ԲՀԿ-ական պատգամավոր Արտյոմ Ծառուկյանը, ինչին ի պատասխան՝ Տնտեսական զարգացման և ներդրումների նախարար Տիգրան Խաչատրյանն ասաց, թե Հարկային օրենսգրքում այնպիսի փոփոխություններ են, որ շատ մեծ ազդեցություն են թողնելու, կան թե՛ կարճաժամկետ, թե՛ երկարաժամկետ ազդեցության գործոններ:
Նրա խոսքով՝ ներդրումային ծրագրերը հաշվարկ են, թե նման ծախսերի դեպքում որքան շահույթ է ապահովվելու:
«Երկարաժամկետ որոշումներ կայացնելու տեսանկյունից այս փաթեթը որոշիչ նշանակություն ունի, և որքան շուտ գան դրանք ԱԺ, այնքան որոշումներն արագ կկայացվեն»,- ասաց Տ.Խաչատրյանը:
Թե ինչո՞ւ նախագիծը շատ արագ չի բերվում ԱԺ, նախարարը նշեց, որ հարկային եկամուտների կրճատումը փոխհատուցելու համար նախատեսվող փոփոխությունների շուրջ հանրային քննարկումների անհրաժեշտություն կա.
«Փաթեթի նկատմամբ հանրային զգայունությունը շատ բարձր է, և հանրային արձագանքն է բարձր: Կառավարությունն աշխատում է բոլոր տեսակետները լսել և բերել այնպիսի փաստաթուղթ, որի շուրջ բոլոր տեսակետները լսված ու հասկացված են»:
«Ես չէի համարի, որ դա ձգձգում է նշանակում, ես կհամարեի, որ մենք օգտագործում ենք ժամանակը՝ բոլոր տեսակետները լսելու համար»,- հավելեց նախարարը:
