«Ընդդիմադիր հիմնական ուժերը դրսում են». Վարազդատ Կարապետյան
Parliamentmonitoring.am-ը զրուցել է «Իմ քայլը» խմբակցության անդամ, ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանի հետ:
-Համաձայն Parliamentmonitoring.am-ի վիճակագրության՝ անցած 10 տարիներին յուրաքանչյուր նստաշրջանի ընթացքում ընդունված օրենքների 80-95%-ը ներկայացրել է կառավարությունը: Սա մտահոգի՞չ թիվ է, և ի՞նչ եք անելու, որ ԱԺ-ն օրենք ընդունելու հետ միասին նաև օրինագծեր մշակի:
-Այո, պատկերը մտահոգող է: Մենք հիմա աշխատում ենք նախարարությունների հետ՝ հասկանալու համար, թե իրենք ինչ ուղղություններով և ինչ օրենսդրական փաթեթներ են պատրաստվում բերել: Բայց պետք է նկատել, որ մեր հարկային օրենսդրությունը և օրենքները ընդհանրապես մշակվել են տարբեր ազդեցությունների ներքո՝ ներքին ազդեցություն` որպես ժողովրդի պահանջ, արտաքին ազդեցություն՝ տարբեր երկրների, միությունների կողմից: Ժողովուրդն էլ իր հերթին ունի իր օրենքները՝ բարոյականությունը, տասնամյակներ իրար հետ ապրելու բնական նորմերը: Եթե ԱԺ-ում ընդունվող օրենքները բնական օրենքների հետ չեն համընկնում, կառավարության ու ժողովրդի միջև խզում է առաջանում, ժողովուրդը չի վստահում կառավարությանը և օրենքին: Դրա հետևանքը լինում է կոռուպցիան: Եվ ես` որպես պատգամավոր, անընդհատ պետք է համայնքներում, ընտանիքներում ուսումնասիրեմ մեր բնական հարաբերությունների համակարգը ու փորձեմ այն օրենք դարձնել:
-«Իմ քայլը» խմբակցության բոլո՞ր պատգամավորներն են դա գիտակցում:
-Այստեղ բոլորը ընտրված մարդիկ են, և կանխավարկածն այն է, որ նրանք ավելի լավ են պատկերացնում բնական բարոյականության նորմերը: Մենք պետք է մշակենք ժողովրդի մեջ ծնվող օրենքներ: Մեր հանձնաժողովի յուրաքանչյուր պատգամավոր ունի գրվելիք օրենքների իր պատկերացումը: Մենք կստեղծենք աշխատանքային փոքր խմբեր և կաշխատենք տարբեր ուղղություններով: Կփորձենք այնպես անել, որ կամ կառավարության բերած նախագծերը համապատասխանեն ժողովրդի պահանջներին, կամ մենք նորը կմշակենք: Ամեն դեպքում՝ ընդունված օրենքների հարաբերակցությունը կփոխվի հօգուտ ԱԺ-ի: Մեր խմբակցությունում օրենք մշակելու ներուժի ավելցուկ կա: Մեր իրավաբանների ու տնտեսագետների թիվը ավելի քան բավարար է, որ օրինագծեր մշակենք: Ժողովրդի շրջանում տեղի ունեցող գործընթացները պետք է լավ ուսումնասիրենք, և ես իմ բոլոր գործընկերներին կոչ եմ անում անընդհատ հանդիպել ժողովրդի հետ:
-Երկու շաբաթ է՝ 7-րդ գումարման ԱԺ-ն սկսել է աշխատանքը, և ձեր խմբակցության պատգամավորներին հիմնականում ճաշարանում ենք տեսնում, իսկ Դուք ասում եք, համայնքներում և ընտանիքներում պետք է ուսումնասիրեք բնական հարաբերությունների համակարգը:
-Դա էլ է աշխատանքային միջավայր, նորմալ է, որ մարդիկ այնտեղ սուրճ խմեն և հարցեր քննարկեն: Եթե քննարկմանը հետևեք, վստահ եմ, կտեսնեք մի ուրիշ որակ, որը նախորդ խորհրդարանի հետ հնարավոր չէ համեմատել: Օրինակ, մեր հանձնաժողովի բոլոր անդամները գյուղերից են, գյուղը ճանաչող մարդիկ են: Հենց այսօր մեր հանձնաժողովի անդամ Սեդրակ Թևոնյանի հետ խոսում էինք իրենց ծիրանի մթերման մասին: Վաղը խնդիրը կբարձրացնենք գյուղնախարարի, մյուս օրը՝ Շուկայի վերահսկողության տեսչության կամ Սննդամթերքի անվտանգության մարմինների առաջ: Շատ վտանգավորը է, երբ մարդը դառնում է պատգամավոր, իսկ մեկ ամիս հետո` երևանաբնակ: Դա նշանակում է, որ կտրվեց հասարակությունից, մտավ այս պատերի մեջ: Մեր աշխատանքի ձևաչափը պետք է փոխենք, հնարավոր չէ նստել այս շենքում և ասել, թե մենք ժողովրդի հետ կապ ենք պահում: Մենք չպետք է վախենանք մարդկանցից, մինչդեռ տեսնում եք, թե մենք քանի պաշտպանիչ կետով ենք անցնում, մինչև այս շենք ենք մտնում: Մեր աշխատանքային միջավայրը պետք է լինի ժողովրդի մեջ: Պատգամավորը պետք է գոնե շաբաթը մեկ անգամ այս շենքից դուրս գա, գնա, նստի համայնքապետարաններում: Ես այդ առաջարկն անելու եմ:
-Ծանր պարտականություն է լինելու, քանի որ հատկապես գյուղական համայնքներում մարդկանց սոցիալական վիճակը շատ ցածր է: Կարող են հոգեբանորեն ճնշված հետ գալ:
-Հնարավոր է: Պետք է այդ դպրոցն անցնենք, այս մարդիկ չեն անցել: Պետք է գնան` նստեն մարդկանց կողքը, նրանց հետ լացեն, և երբ վերադառնան, իմանան, որ մեկ շաբաթ հետո էլի են գնալու: Եվ եթե այստեղ սխալվեցին, այնտեղ իրենց չեն ներելու:
-Երբ պատգամավորները վերադառնան այդ տխուր համայնքներից, պետք է կառավարության առաջ համապատասխան պահանջներ դնեն: Կառավարությունը պատրա՞ստ է դրանք ընդունել և քայլեր ձեռնարկել:
-Մենք կստեղծենք մեխանիզմներ, որ կառավարությունը դա ընդունի: Չենք հարցնելու` պատրա՞ստ եք, թե՞ ոչ: Մենք խորհրդարանական երկիր ենք: Արդեն սկսել ենք կանչել պատասխանատու պաշտոնյաներին՝ լսելու նրանց հաշվետվությունը այս կամ այն դեպքի վերաբերյալ: Եթե կա հանրային ընդվզում, դա արտահայտողն առաջին հերթին մենք պիտի լինենք:
-Շատ է խոսվում այն մասին, որ ձեր խմբակցության ճնշող մեծամասնությունը պատգամավոր դարձավ Նիկոլ Փաշինյանի բարձր վարկանիշի շնորհիվ, ուրեմն, նրա կառավարության առաջարկությունները կընդունեք անվերապահորեն:
-Եթե զգամ, որ Նիկոլ Փաշինյանը սխալ որոշում է ընդունում, այնքան կխոսեմ, մինչև հասկանամ, որ մեր ձայնը տեղ է հասել: Մեր խմբակցությունում նման մարդիկ շատ են:
-ԱԺ-ում, ըստ էության, ձեր իշխանությանը անողոք քննադատող ընդդիություն չկա, և «Իմ քայլը» խմբակցությունը դրանից պետք է շատ լավ զգա. այդպե՞ս է:
-Ինձ համար դա նշանակություն չունի: ԱԺ-ից դուրս ես ունեմ շատ ընկերներ, որոնք ինձանից հաշվետվություն են պահանջում: Դա է ինձ համար ընդդիմությունը, իսկ թե այստեղ ով որտեղից կգոռա, էական չէ:
-Ձեր տպավորությամբ հիմնական ընդդիմադիր ուժերը դրսո՞ւմ են, թե՞ ԱԺ-ում են:
-Իմ տպավորությամբ` դրսում են:
-Կարո՞ղ է՝ արտախորհրդական ընդդիմադիր զարգացումներ լինեն:
-Ես կարծում եմ, որ բոլոր խելամիտ ուժերը պետք է կառավարությանը ժամանակ տան, բայց եթե տեսնում են, որ հարցեր կան, որտեղ մենք էական բացթողում ունենք, պետք է անպայման լսելի լինեն: Խնդրանքս այդ ուժերին այն է, որ կառուցողական լինեն, եթե մի լույսի դեմ փակում են, այլ լույսի տեղ ցույց տան: Դա է իրենց գործառույթը:
