Բողոքի ալիք Վենետիկում. ակտիվիստները դեմ են սուպերյախտով ժամանող ԱՄՆ միլիարդատեր դեսպանի այցին
Վենետիկում ակտիվիստները ծրագրում են խափանել միլիարդատեր և Իտալիայում ԱՄՆ դեսպան Թիլման Ֆերտիտայի այցը, որը մտադիր է քաղաք ժամանել իր 117-մետրանոց սուպերյախտով՝ երկրի ափերով զբոսաշրջային շրջագայության շրջանակներում, հաղորդում է The Guardian-ը։
Տեղական լրատվամիջոցների փոխանցմամբ՝ բողոքի ակցիայի մասնակիցները կարծում են, որ քաղաքի պատմական կենտրոնում նման մեծ մասնավոր նավի մուտքը կդառնա հարուստ սեփականատերերի չափազանց մեծ ազդեցության խորհրդանիշը և Վենետիկի «առևտրայնացման» հերթական օրինակը։
Հինգշաբթի օրը կայացած ակտիվիստների հավաքի ժամանակ մասնակիցներից մեկը՝ հետազոտող և հասարակական ակտիվիստ Ստելլա Ֆաեն, հայտարարել է. «Անցյալ տարի մենք փչացրինք Ջեֆ Բեզոսի տոնը, այս տարի եկեք փչացնենք դեսպանի շրջագայությունը»։
Ֆերտիտան ծրագրում է Վենետիկ այցելել հուլիսի 17-ին՝ «Coastal Diplomacy 250» («Ափամերձ դիվանագիտություն 250») նախաձեռնության շրջանակներում, որը նվիրված է ԱՄՆ անկախության 250-ամյակին և Հռոմի ու Վաշինգտոնի միջև կապերի ամրապնդմանը։ Երթուղին որոշակի ճանապարհորդություն է ներառում Իտալիայի ափերի երկայնքով։
Ակտիվիստների տեղեկություններով՝ նավը կարող է խարիսխ գցել քաղաքի պատմական հատվածում Ռեդենտորեի տոնակատարության ժամանակ, որը վենետիկյան օրացույցի կարևորագույն իրադարձություններից է և նվիրված է 16-րդ դարի ժանտախտի համաճարակի ավարտին։ Այս օրերին քաղաքում ավանդաբար տեղադրվում է ժամանակավոր պոնտոնային կամուրջ, իսկ երեկոյան անցկացվում է հսկայածավալ հրավառություն, որը հավաքում է հազարավոր բնակիչների և զբոսաշրջիկների։
Բողոքողները մտահոգված են, որ մեծ զբոսանավի ներկայությունը կարող է փակել տեսադաշտը և փոխել տոնի ընթացքը, որն, իրենց խոսքով, «պետք է մնա քաղաքի բնակիչների սեփականությունը»։
«Ռեդենտորեն այն սակավաթիվ պահերից է, որոնք դեռ պատկանում են Վենետիկին»,— հայտարարել է Ֆաեն։
Աղբյուրների տվյալներով՝ Ֆերտիտայի զբոսանավը վեց տախտակամածանի նավ է՝ երկու ուղղաթիռային հրապարակով ու լողավազաններով, որի արժեքը գնահատվում է մոտ 450 միլիոն դոլար։ «Venezia Terminal Passeggeri» օպերատորի տեղեկությունների համաձայն՝ նման չափսերի նավերի համար քաղաքի կենտրոնում կայանման տեղերը սահմանափակ են և գտնվում են Պունտա դելլա Դոգանայի մոտ կամ Ռիվա դեյ Սետտե Մարտիրի առափնյա հատվածում, որոնք տեղացիների սիրելի դիտակետերն են։
Բողոքի շարժման մեկ այլ մասնակից՝ Ջուլիա Կակապորդոն, հայտարարել է. «Այս զբոսանավին Վենետիկ մուտք գործելու թույլտվություն տալը ապտակ է քաղաքի բնակիչներին։ Մի քաղաքում, որտեղ կյանքի որակը վատանում է, և մարդիկ ապրելու տեղ չունեն, հարուստներն իրենց այնպես են պահում, ասես ամեն ինչ կարող են իրենց թույլ տալ»։
Հանդիպման մասնակիցների խոսքով՝ այս իրավիճակն արտացոլում է ավելի գլոբալ մի խնդիր՝ Վենետիկի վերածումը մի «ցուցափեղկի», որը հասանելի է հարուստ հյուրերի ժամանակավոր ներկայության համար, բայց ավելի ու ավելի անպիտան է դառնում տեղացիների բնակության համար։
