Ջեֆ Բեզոսը զիջել է դիրքերն աշխարհի ամենահարուստ մարդկանց վարկանիշում
Amazon-ի հիմնադիր Ջեֆ Բեզոսը զիջել է դիրքերը աշխարհի ամենահարուստ մարդկանց վարկանիշում ընկերության բաժնետոմսերի կտրուկ անկումից հետո։ Amazon-ի բաժնետոմսերը Նյու Յորքի բորսայում արժեզրկվել են ավելի քան 9%-ով շահույթի թույլ կանխատեսման և ծախսերի կտրուկ աճի մասին հայտարարությունից հետո, հայտնում է Bild-ը։ Ըստ Forbes-ի, Բեզոսի կարողությունը մեկ օրում նվազել է 16 միլիարդ դոլարով՝ հասնելով 218,9 միլիարդի։
Ներդրողներին հիասթափեցրել են ընկերության եռամսյակային արդյունքներն ու 2026 թվականի ծրագրերը։ Մեկ բաժնետոմսի շահույթը կազմել է 1,95 դոլար, ինչը ցածր է շուկայի սպասումներից, իսկ հաջորդ տարվա համար հայտարարված շուրջ 200 միլիարդ դոլարի ներդրումները մտահոգություն են առաջացրել։
Այս ֆոնին սակարկությունների բացումից անմիջապես հետո Amazon-ի բաժնետոմսերի գինն ընկել է մինչև մոտ 202 դոլար։ Վերլուծաբանները վաճառքների ալիքը նախևառաջ պայմանավորում են արհեստական բանականության զարգացմանն ուղղված աճող ծախսերով։
Բաժնետոմսերի անկումն անմիջականորեն անդրադարձել է միլիարդատերերի ցանկում Բեզոսի զբաղեցրած դիրքի վրա։ Նրան շրջանցել է Meta-ի ղեկավար Մարկ Ցուկերբերգը, որի կարողությունը Forbes-ը գնահատում է 226,6 միլիարդ դոլար։ Բեզոսն իջել է հինգերորդ հորիզոնական, իսկ վարկանիշային աղյուսակը շարունակում է գլխավորել Իլոն Մասկը։
