5 քրեակատարողական հիմնարկով անցած մարդ եմ. այդ բառապաշարով ինձ հետ մի՛ մրցեք. Փաշինյան

Նիկոլ Փաշինյանը հրավիրված ասուլիսում անդրադարձավ նաև սեփական քաղաքական հենարանի՝ ՔՊ-ի լրատվական կայքի լրագրողի հիշեցում-հարցադրմանը, թե մասնավոր ընկերությանը ճանապարհ «արտապատվիրակելու» Նիկոլ Փաշինյանի՝ դեռ 2022 թվականի առաջարկին Ադրբեջանը չի համաձայնել․ այժմ ադրբեջանական կողմն ի՞նչ մոտեցում ունի, արդյո՞ք այս գործընթացում ԱՄՆ-ը ունի միջնորդական դերակատարում՝ հաշվի առնելով տարածվող լուրերը։

«Երբ մենք խոսում էինք սահմանային, մաքսային հսկողությունների մասին, կար այնպիսի ընկալում, որ Ադրբեջանի քաղաքացիները կխուսափեն, որ ՀՀ մաքսային ծառայությունների հետ շփումները կարող են որոշակի խնդիրներ առաջացնել։ Այդ  ժամանակ մենք 2022 թվականին հրապարակային առաջարակություն արել ենք, որ պատրաստ ենք այդտեղ կիրառել «ֆրոնտ օֆիս» և «բեք օֆիս» տարբերակը․ կան երկրներ, որոնք իրենց սահմանային և մաքսային ծառայություններն արտապատվիրակում են այդ ոլորտում պրոֆեսիոնալ կազմակերպություններին։

Բայց վերջին շրջանում նման առաջարկ չի քննարկվել, այդ ժամանակ է առաջարկ եղել  ու չի ընդունվել, բայց վերջին շրջանում նման հարց ընդհանրապես չի քննարկվել»,- մանրամասնեց նա՝ վստահեցնելով, որ նմանատիպ խոսույթների դեպքում պետք է վստահ լինել, որ  դա քննարկվում է ՀՀ տարածքային ամբողջականության, իրավազորության, ինքնիշխանության համատեքստում։

Անդրադառնալով վերբալ հրադադարի, դրա հանգուցալուծման մասին լրագրողի մյուս հարցադրմանը, ինչպես նաև՝ «Հրապարակ» օրաթերթի դեմ իր կողմից ներկայացված հայցին՝ Նիկոլ Փաշինյանը նկատեց․

«Հրադադարը՝ հրադադար, բայց հետաքրքիր բան տեղի ունեցավ․ երբ մեր որոշ գրառումների մարդիկ արձագանքում էին, թե ո՞նց կարելի է՝ երկիր ղեկավար, երկրի ղեկավարի ընտանիքի անդամ․․․ ու հետաքրքրիր բան պարզվեց՝ որ այդ ամենն ասում են մեր հասցեին, այդ թվում՝ քաղաքական մակարդակում, մենք այդ ժամանակ երկրի ղեկավար չե՞նք։ Ու ինչն է հետաքրքիրը, տխուրը, որ այս մոտեցումը ցույց տվեց իր արդյունավետությունը, որովհետև մարդիկ կան՝ մտածում են, որ չի կարող նույն կերպ և դեռ մի բան էլ ուժեղացված դոզաներով հակադարձում լինել, իրենց շատ անկաշկանդ են զգում։

Ես ասում եմ՝ չի կարող այդպես լինել։ Մենք կորոշենք՝ ում, երբ, ինչպես, ինչ դոզայով, բայց իմացեք, որ այդ գործիքակազմն այլևս կա։

Կամ՝ ես անում եմ մեկ ուրիշ առաջարկ՝ եկեք ընդհանրապես հրաժարվենք այդ գործելակերպից։ Այո, ՀՀ-ում քննադատության հնարավորության սահամանափակում չկա․ եկեք, այո՛, սուր, քննադատաբար, կոշտ, բայց և հայհոյախոսությանը վերջ տանք։ Եթե դա է հաղորդակցության ընդունված․․․ սաղմոսը, աղոթքը, սերը, խոնարհությունը, կոչը, հորդորը  չի ազդում․․․

Էդ բառապաշարով թող ոչ ոք չփորձի մրցակցել ինձ հետ․ ես 5 քրեակատարողական հիմնարկներում երկար ժամանակ անցկացրած մարդ եմ՝ բանասիրական ու բանահյուսական հետաքրքրություններով․ պետք չի պանդորայի արկղը բացել»։

Նիկոլ Փաշինյանը հավելեց՝ իր լավագույն պատկերացումը բովանդակային քննադատությունն է․ հայհոյանքը փաստարկի բացակայությունն է։

Մանրամասները՝ տեսանյութում