Մակրոնը Կահիրեում բանակցություններ է անցկացրել ալ-Սիսիի հետ
Պաշտոնական այցով Եգիպտոս ժամանած Ֆրանսիայի նախագահ Էմանուել Մակրոնն ապրիլի 7-ի առավոտյան պաշտոնական բանակցություններ է վարել Եգիպտոսի իր գործընկեր Աբդել Ֆաթթահ ալ-Սիսիի հետ։ Տեղի է ունեցել ընդունելության պաշտոնական արարողություն։ Այս մասին հայտնել է եգիպտական MENA լրատվական գործակալությունը։
Բացի այդ, նախատեսվում է եռակողմ գագաթնաժողով Եգիպտոսի նախագահ Աբդել Ֆաթթահ ալ-Սիսիի և Հորդանանի թագավոր Աբդալլահ II-ի մասնակցությամբ։ Գագաթնաժողովի ընթացքում առանցքային թեմա է լինելու Գազայի հատվածի արաբական ծրագրին աջակցելը՝ ի հակադրություն ԱՄՆ նախագահ Դոնալդ Թրամփի ծրագրի։
Եգիպտոսի նախագահի պաշտոնական խոսնակ, դեսպան Մոհամեդ աշ-Շենավին հայտարարել է, որ երկկողմ քննարկումների արդյունքում ստորագրվել է համատեղ հռչակագիր՝ եգիպտաֆրանսիական հարաբերությունները ռազմավարական գործընկերության մակարդակի բարձրացնելու համար, ինչպես նաև տեղի է ունեցել տարբեր ոլորտներում փոխըմբռնման հուշագրերի ստորագրում։
Համատեղ մամուլի ասուլիսում նախագահ ալ-Սիսին ընդգծել է, որ այս այցը «մարմնավորում է երկու երկրների միջև արդյունավետ համագործակցության երկարատև ուղի»՝ հավելելով, որ նոր ռազմավարական գործընկերությունը «կարևոր քայլ է համագործակցության նոր հորիզոններ բացելու ուղղությամբ»։
Երկու նախագահները քննարկել են տնտեսական համագործակցության ընդլայնման ուղիները, ընդ որում, ալ-Սիսին ընդգծել է եգիպտական տնտեսության մեջ ֆրանսիական ընկերությունների ներգրավվածության ընդլայնման կարևորությունը:
Երկու նախագահները քննարկել են տարածաշրջանում տիրող իրավիճակը՝ ընդգծելով Գազայում հրադադարի անհրաժեշտությունը և մարդասիրական օգնության հրատապ մուտքը։ Ալ-Սիսին կտրականապես մերժել է պաղեստինցիներին տեղահանելու ցանկացած գաղափար։
Երկու ղեկավարները քննարկել են նաև Սիրիայում և Լիբանանում տիրող իրավիճակը՝ ընդգծելով Սիրիայի միասնության և տարածքային ամբողջականության պահպանման կարևորությունը, ինչպես նաև աջակցություն են հայտնել Լիբանանի կառավարությանը կայունության հասնելու ջանքերում։
Նախագահ ալ-Սիսին ընդգծել է, որ այս այցը երկու երկրների միջև «ռազմավարական համագործակցության նոր սկիզբ» է՝ վստահություն հայտնելով, որ հաջորդ փուլը ականատես կլինի եգիպտացի և ֆրանսիացի ժողովուրդների պատմական բարեկամության հետագա ամրապնդմանը:
