Պատրիարք Կիրիլը Մարգարիտա Սիմոնյանին շքանշանով է պարգևատրել
Մոսկվայի և Համայն Ռուսիո պատրիարք Կիրիլը «Ռոսիա սեգոդնյա» միջազգային մեդիախմբի և RT հեռուստաալիքի գլխավոր խմբագիր Մարգարիտա Սիմոնյանին շնորհավորել է ծննդյան օրվա առիթով և շնորհել Իշխանուհի Օլգայի 3-րդ աստիճանի եկեղեցական շքանշան։ Տեղեկությունը հայտնում է ՌԻԱ Նովոստին։
«Հաշվի առնելով ձեր ներդրումը ժամանակակիցների կյանքում հոգևոր-բարոյական արժեքների ամրապնդման գործում, ինչպես նաև նշվող տարեդարձի առիթով, արդարացի եմ համարում Ձեզ արժանացնել Իշխանուհի Օլգայի շքանշանին (III աստիճան)»,- ասված է պատրիարքի շնորհավորական ուղերձում։
Հավելենք, որ նախորդ տարեվերջին ՌԴ նախագահ Վլադիմիր Պուտինը Մարգարիտա Սիմոնյանին պարգևատրել էր «Հայրենիքին մատուցած ծառայությունների համար» 3-րդ աստիճանի շքանշանով։
Հիշեցնենք, որ Սիմոնյանն այսօր նշում է 45-ամյակը։ Ավելի վաղ տարեդարձի առիթով Սիմոնյանին շնորհավորել էին ՌԴ ԱԳ նախարար Սերգեյ Լավրովն ու ՌԴ քննչական կոմիտեի նախագահ Ալեքսանդր Բաստրիկինը։
