Նիկոլ Փաշինյանը հորս էր խոստացել, որ արդար քննություն կլինի, բայց փաստացի չկա․ Փոխգնդապետ Արա Մխիթարյանի գործով նոր հանգամանք է ի հայտ եկել
Վճռաբեկ դատարանն Արա Մխիթարյանի մահվան փաստը որպես նոր ի հայտ եկած հանգամանք է հիմք ընդունել և բեկանել է Հարություն Գրիգորյանի նկատմամբ կայացված դատական ակտը՝ գործն ուղարկելով նոր քննության։
Փոխգնդապետի հայրը՝ Սամվել Մխիթարյանը, հույս ունի, որ իր որդու ծեծի մեղավորներից մեկն այս անգամ գոնե կպատժվի։
«Այսօր նամակ եմ ստացել Արտաշատից, տեղեկացել, որ գործը նորից ուղարկել են քննության։ Ինքը պետք է անպայման նստի։ Իրենց հույսը երևի նա է, որ ժամկետն անցնի։ Այս պետությունից ամեն ինչ սպասելի է, չգիտեմ»,- 168․am-ի հետ զրույցում նշեց Սամվել Մխիթարյանը։
Արա Մխիթարյանի եղբայրը՝ Կարեն Մխիթարյանը, հավելեց՝ իրենց խնդիրն այն է, որ Հարություն Գրիգորյանը շարունակի «նստել»։ Նա, սակայն, հաշվի առնելով այս գործով նախադեպերը, նոր քննության հետ ևս մեծ հույս չի կապում։
«Արդեն ինչ որ է՝ մեկ հոգու վրա է մնացել ամբողջը։ Գոնե 2-3 հոգի կատարվածի համար պետք է պատասխան կրեին, իսկ որ մի քանի հոգով են զարկել, մյուս տուժածներն էին ասել։ Դա մի հոգու հարված չէր, մեկ հոգին չէր կարող հարվածել և՛ եղբորս, և՛ Լևոն Հարությունյանին, որը եղբորս պաշտպանել է․ պառկել է վրան, որ չխփեն․․․»,- մանրամասնեց նա։
Ըստ Կարեն Մխիթարյանի՝ պարզ էր նաև, որ միջադեպից հետո նաև պաշտոնից ազատված Տրդատ Սարգսյանը որևէ կերպ պատասխանատվություն չէր կրի կատարվածի համար։
«Տրդատը շարժման ժամանակ քայլել էր Նիկոլի հետ․ նա հո չէ՞ր դնելու դատեր նրան։ Բայց Նիկոլ Փաշինյանը նաև Գյումրիում երկու անգամ հանդիպել ու հորս էր խոստացել, որ արդար քննություն կլինի, բայց փաստացի դեռ չկա»,- հավելեց նա։
Փոխգնդապետը դաժան ծեծի էր ենթարկվել 2019 թ. սեպտեմբերի 18-ին՝ Վայոց ձորի մարզի Եղեգնաձոր քաղաքում: Գործով մեղադրանք էր առաջադրվել Վայոց ձորի նախկին մարզպետի օգնական Հարություն Գրիգորյանին, մեղադրյալի կարգավիճակում էր նաև նրա եղբայրը՝ Զավեն Գրիգորյանը։ Միջադեպից մեկ շաբաթ անց պաշտոնից հրաժարական էր տվել Վայոց ձորի մարզպետ Տրդատ Սարգսյանը, որը, ըստ շրջանառվող տեղեկությունների և որոշ վկայությունների՝ դեպքի վայրում է եղել և անմիջական մասնակցություն ունեցել միջադեպին: Այդուհանդերձ Տրդատ Սարգսյանին մեղադրանք չէր առաջադրվել. Քննչական կոմիտեն հայտնել էր, թե Սարգսյանը 2019թ. սեպտեմբերի 17-ին տեղի ունեցած վիճաբանությանն ականատես չի եղել, դեպքի վայրում չի գտնվել:
Դեռ նախորդ տարի հայտնի էր դարձել, որ Վերաքննիչ դատարանը չեղարկել է Եղվարդի դատարանի որոշումը, որով Վայոց ձորի մարզի Եղեգնաձոր քաղաքում դաժան ծեծի հետևանքով մահացած փոխգնդապետ Արա Մխիթարյանի գործով միակ դատապարտյալը` նախկին մարզպետ Տրդատ Սարգսյանի օգնական Հարություն Գրիգորյանը, պայմանական վաղաժամկետ ազատ էր արձակվել։ Հարություն Գրիգորյանն ինքն էր դիմում ներկայացրել պայմանական վաղաժամկետ ազատ արձակման հանձնաժողովին, որպեսզի իրեն ազատ արձակեն․ հարազատները տեղեկացրել էին, թե Գրիգորյանին ազատ արձակելու հիմքն այն է եղել, որ իրեն քրեակատարողական հիմնարկում լավ է պահել:
Հիշեցնենք՝ շուրջ 4 տարի կոմայի մեջ գտնվող փոխգնդապետ Արա Մխիթարյանը մահացել էր 2023 թվականի հուլիսի 27-ին, իսկ նրա գործով հարազատները շարունակ արձանագրում էին՝ դատական գործընթացը սառեցվում է իշխանությունների ջանքերով:
Ի դեպ, մեղադրյալ Հարություն Գրիգորյանի պաշտպան Լևոն Սահակյանը Վճռաբեկ դատարանի որոշումը համարել է ապօրինի՝ մասնավորապես նշելով.
«Որոշումն ապօրինի է, քանի որ դատախազի բացառիկ վերանայման բողոքը ներկայացվել է օրենքով սահմանված ժամկետի խախտմամբ և այն նույնիսկ վարույթ պետք է չընդունվեր։ Այսպես` ՀՀ քրեական դատավարության օրենսգրքի 404-րդ հոդվածի 1 ին մասի համաձայն` բացառիկ վերանայման բողոք կարող է ներկայացվել այն պահից, երբ բողոք բերելու իրավունք ունեցող անձն իմացել է կամ կարող էր իմանալ համապատասխան հանգամանքների առաջացման կամ հայտնաբերման մասին: Բացառիկ վերանայման բողոքը ՀՀ գլխավոր դատախազի տեղակալը ներկայացրել է 2024թ. օգոստոսի 5-ին։
Արա Մխիթարյանը մահացել է 2023թ. հուլիսի 27-ին (բողոք ներկայացնելուց ավելի քան մեկ տարի առաջ)։ Դիակի դատաբժշկական փորձաքննության եզրակացությունը պատրաստ է եղել 2023թ. նոյեմբերի 23-ից (բողոքը ներկայացնելուց շուրջ 8 ամիս առաջ)։ Վերոգրյալի մասին մենք մանրամասն նշել ենք Վճռաբեկ բողոքի պատասխանում, սակայն այն ընդհանրապես չի քննարկվել»։
