Չափը պահե՛ք, որ երեսատեղ ունենաք. տեսաք չէ՞՝ ընտրություններով մենակ հաղթել հնարավոր չէ. Արմեն Աշոտյան

«Ինչպես Հայաստանի կեսից ավելին, ես էլ մինչև ուշ գիշեր հետևել եմ Գյումրիի ընտրություններին»,- իր գործով դատական նիստից հետո 168.am-ի հետ ավանդական հարցուպատասխանի ժամանակ ասաց քաղբանտարկյալ, Հայաստանի հանրապետական կուսակցության (ՀՀԿ) փոխնախագահ Արմեն Աշոտյանը՝ անդրադառնալով երեկ Գյումրիում տեղի ունեցած ավագանու արտահերթ ընտրություններին:

Վերջինս նկատեց՝ մի քանի հետևություն է արել.

1. Հետևություն N1

Նիկոլն ընդունակ է ամեն ինչի սեփական իշխանությունը վերարտադրելու համար նույնիսկ հանրապետության 2-րդ քաղաքում:

2. Հետևություն N2

Կիրառելով տեխնոլոգիաներ, վախի մթնոլորտ ստեղծելով, ճնշում գործադրելով՝          1/3-ով ստացվում է Նիկոլի մոտ:

3. Հետևություն N3

Ոչ մի քաղաքական ուժ մենակ չի կարող հաղթել Նիկոլին, և Գյումրին դա էլ ցույց տվեց:

4. Հետևություն N4

Մեր հարգարժան ընդդիմադիր գործիչները տարբեր ճամբարներից, իրենց հակաքարոզչության մեջ, այդ թվում՝ Սերժ Սարգսյանի, Հանրապետականի, մեր ընկերների կամ գործընկերների հանդեպ, մի քիչ չափը պետք է պահեն, որ վաղը-մյուս օրը երեսատեղ ունենան առհասարակ էդ միասնական պայքարի համար: Որ ասում են՝ ընտրություններով կարելի է հաղթել, անգամ, եթե էդ մարդիկ տեսականորեն իրենց ճիշտ են համարում, ընտրություններով մենակ հաղթել հնարավոր չէ, և այստեղ ստացվեց հենց այդպիսի պատկեր; Իսկ եթե հնարավոր չէ, և ակնկալվում են նաև այլ տեսակի ընդդիմադիրների աջակցություններ, ապա կներեք, երեսատեղ պետք է թողնել:

Վերջում Արմեն Աշոտյանը դիմեց Գյումրիի ընտրություններում 3-րդ տեղը գրաված Մարտուն Գրիգորյանին:

«Ուզում եմ իմ համեստ ձայնը միացնել Մարտուն Գրիգորյանից ակնկալիքներ ունեցողներին, իրեն խնդրողներին, որպեսզի մենք Գյումրիում չունենանք ՔՊ-ական քաղաքապետ… Վստահ եմ, Մարտունին ճանաչելով, կոնկրետ քայլեր կհետևեն իր խոստումը կյանքի կոչելու համար»,- ասաց ՀՀԿ փոխնախագահը:

Ինչ վերաբերում է Եվրաքվեի օրենքն ընդունելուն, Արմեն Աշոտյանը հիշեցրեց տարածված օրինակը:

«Եվրոպացիք ասում էին՝ մենք ձեզ ժամադրում էինք, բայց պսակվել չենք խոստանում: Հետևելով եվրոպական ռեակցիային՝ ես շատ անկեղծ ասեմ՝ ոչ թե ժամադրելու են ու չպսակվեն, այլ կենակցելու են ու չպսակվեն»,- եզրափակեց Արմեն Աշոտյանը:

Մանրամասները՝ տեսանյութում: