Նիկոլ Փաշինյանը ձեռնոց է նետում հայ ազգին, որը պետք է որոշի՝ զոհելով Արցախը, Հայաստանը պահում է Նիկոլի՞ն, թե՞ նախընտրում է ունենալ հայրենիք. Մետաքսե Հակոբյան
Այս շաբաթ խորհրդարանում Կառավարության հետ հարցուպատասխանի ժամանակ Նիկոլ Փաշինյանը հայտարարեց արցախյան շարժումը «փակելու» մասին, շեշտելով՝ «չենք պատրաստվում շարունակել ղարաբաղյան շարժումը»։
«Հո Ղարաբաղի մասին գոռալո՞վ չէ, այո՛, մենք չենք շարունակում ղարաբաղյան շարժումը, ուզում եք՝ թռեք վերև, իջեք ցած։ Ասում եմ՝ դա ՀՀ պաշտոնական դիրքորոշումն է, եթե ՀՀ ժողովուրդը համաձայն չլինի իմ այս դիրքորոշման հետ, ես վաղը, որևէ պահի կդադարեմ լինել ՀՀ վարչապետ, դուք կլինեք ՀՀ վարչապետ»,- ասել է նա։
Մինչ Նիկոլ Փաշինյանը հայտարարում է Արցախի շարժումը «փակելու» մասին՝ Արցախից բռնի տեղահանված 150.000-ից ավելի արցախահայեր շարունակում են Հայաստանում ու Հայաստանի սահմաններից դուրս ապրելու տեղ փնտրել, բախվել տարատեսակ խնդիրների՝ տարրական իրավունքների իրացումից սկսած՝ մինչև սոցիալական խնդիրներ։
Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանի խոսքով՝ Նիկոլ Փաշինյանն առհասարակ որևէ կապ չունի ո՛չ Արցախի, ո՛չ արցախյան շարժման հետ, որպեսզի այդ շարժումը փակի։
«Նրա այս քայլերը հակառակ արդյունքն են տալու արցախահայերի պայքարի հարցում։ Արցախյան շարժումը մենք երբեք չենք դիտարկել միայն արցախահայերի շարժում, այն ողջ հայության շարժումն է, ողջ հայ ազգի։
Նիկոլը չի սկսել արցախյան շարժումը, որ ինքն էլ ավարտի, նույնիսկ Արցախի ԱԺ պատգամավորների մեծ մասը չի սկսել այդ շարժումը, նկատի ունեմ վերջին նստաշրջանում ընտրված պատգամավորների մեծ մասին։
Նիկոլ Փաշինյանի այդ հայտարարությունը վկայում է, որ մենք մեր ուժերը պետք է կրկնապատկենք, եռապատկենք ու Արցախի խնդիրը պետք է կրկին դառնա ողջ հայ ազգի խնդիրը։ Նիկոլ Փաշինյանն իր այդ հայտարարությամբ ձեռնոց է նետում մեր ազգին, ավելին՝ նա այդ եզրահանգման եկել է միանձնյա որոշմամբ, հայ ազգը հակառակ կարծիքն ունի։ Ըստ էության, նա ձեռնոց նետելով ժողովրդին՝ փորձում է լեգիտիմացնել իր քայլերն ու որոշումները»,- 168.am-ի հետ զրույցում նշեց Մետաքսե Հակոբյանը։
Պատգամավորի դիտարկմամբ՝ հայ ազգը պետք է որոշի՝ զոհելով Արցախը, Հայաստանի Հանրապետությունը պահում է Նիկոլի՞ն, թե՞ նախընտրում է ունենալ հայրենիք ու պետականություն։
«Ցավոք, այս պահին ժողովուրդը՝ կարևոր հարցերը թողած, դեռևս քննարկում է մանր հարցերը, ԱԺ-ում նրա ոչ ադեկվատ պահվածքը մարդկանց շեղեց գլխավոր խնդիրներից։
Նա այդ բոլոր հայտարարություններն անում է հենց դրա համար, որպեսզի քննարկեն իր պահվածքը, ոչ թե նրա հայտարությունները, օրինակ, որ այդպես էլ չասաց, թե Ադրբեջանն այսքան ժամանակ ի՞նչ փոխզիջումների է գնացել։
Ի վերջո, ազգը պիտի հասկանա, որ Նիկոլ Փաշինյանը դեղերի կարիք չունեցող մարդ է, քանի որ ծրագրավորված իրականացնում է այն քայլերը, որոնք իր առջև դրված են։ Նա իր այդ բոլոր քայլերով շարունակում է խորացնել մեր ազգի ծանր հոգեբանական վիճակը։ Պիտի լինի մեծ գիտակցում, որպեսզի մարդիկ իրենց վրայից կարողանան թոթափել անզորության, խեղճության զգացումը»,- հավելեց Մ. Հակոբյանը։
Նա նաև շեշտեց՝ Արցախի ու արցախահայերի վերադարձի համար պայքարը, եթե ոչ այս պահին, ապա որոշ ժամանակ անց տալիս է իր արդյունքը, ուստի պետք է պայքարել, դրա վառ օրինակն է Շվեյցարիայի խորհրդարանի ընդունած՝ արցախահայերի հավաքական վերադարձի համար համաժողով անցկացնելու վերաբերյալ բանաձևը։
Շվեյցարիան այն երկրներից է, որը երբևէ որևէ բանաձև Հայաստանի մասով չի ընդունել։ 2003 թվականին Հայոց ցեղասպանության հետ կապված փորձել են բանաձև ընդունել, սակայն խորհրդարանի ստորին պալատի ընդունելուց հետո վերին պալատում այն չի ընդունվել։
«Եթե ազգն ընկալի, որ յուրաքանչյուրից մեծ բան է կախված, ապա հնարավոր կլինի կանգնեցնել աղետը և հեռացնել այս իշխանություններին, այլ տարբերակ չկա»,- ընդգծեց Մետաքսե Հակոբյանը։
