Վարդան Ղուկասյանին խորհուրդ կտամ՝ դասեր քաղի Ռոբերտ Քոչարյանի դառը փորձից. Սուրեն Սուրենյանց
«Նիկոլը ողջախոհությունը կորցրել է։ Նա այնպիսի հակավարկանիշ ունի, որ ում կողքը կանգնեց, այդ մարդը փչանում է։ Նա գնացել էր Գյումրի՝ իրավապահներին ցուցում տալու, որ ամեն գնով թույլ չտան ընդդիմության հաղթանակը։ Վարչական ռեսուրսի նման գռեհիկ չարաշահում, ինչը հիմա Գյումրիում է, ես երբեք չեմ տեսել։ Բայց իրեն ոչինչ չի օգնելու։ Նիկոլ Փաշինյանն ըստ էության նախապատրաստում է տոտալ կեղծիքներ, կամ սադրանք կանի՝ ընտրությունները հետաձգելու համար։ Գյումրիում այս ընթացքում պրովոկատորների պակաս չի լինելու»,- «Պրեսսինգ» հաղորդաշարի եթերում ասաց «Դեմոկրատական այլընտրանք» կուսակցության նախագահ Սուրեն Սուրենյանցը՝ անդրադառնալով Գյումրու ավագանու արտահերթ ընտրություններին:
Նրա խոսքով՝ Գյումրիում մեծ ընդվզում կլինի, եթե Նիկոլ Փաշինյանը փորձի ընդդիմադիր որևէ թեկնածուի կալանավորել։
«Թող փորձի: Մնում է՝ Գյումրիում ընտրություններին մասնակցող ընդդիմադիր ուժերից որևէ մեկը չտրվի քաղաքական անասնագողության։ Այն ընդդիմադիր ուժերը, ովքեր ընդդիմադիր բաժանարար գծերի հարցում կարմիր գծեր չունեն, կարող են պոտենցիալ գնալ սցենարին։ Ես վստահաբար ասում եմ՝ մեր ցուցակի առնվազն առաջին 15 համարը գործարքի չի գնա»,- ասաց Սուրեն Սուրենյանցը:
Քաղաքական գործիչը նկատեց՝ ընտրություններին ընդդիմադիրների քողի տակ մասնակցում են նաև իշխանական պրոյեկտներ:
«Ֆայտոնչի Արտյոմ Թումանյանը, ում կեղծ ամբաստանության հիմքով պրոդյուսեր Արմեն Գրիգորյանը դատարանում մահացավ, և Երևանում ՔՊ-ի հետ քաղաքական գրդոն անող Արամ Զավենի Սարգսյանի «Հանրապետություն» կուսակցությունը՝ իր Եվրադաշինքով։ Գյումրեցին ձայն չի տա մի մարդու, ում կեղծ ցուցմունքով Արմեն Գրիգորյանին մահվան հասցրեցին, սպանեցին հենց դատարանի դահլիճում:
Ի դեպ, դիմում եմ հարգարժան Ստեփան Դեմիրճյանին․ միգուցե չգիտի, բայց ֆայտոնչին՝ Արտյոմ Թումանյանը, շահարկում է ազգային հերոս Կարեն Դեմիրճյանի անունը։ Թեկնածուներից՝ 9-ից 6-ն են ընդդիմադիր։ Էն երեքին ձայն տալ՝ նշանակում է ձայն տալ Նիկոլ Փաշինյանին»,- ասաց նա:
Սուրեն Սուրենյանցը խոսեց նաև թեկնածուներից Վարդան Ղուկասյանի դիրքավորման ու հռետորաբանության մասին:
«Վարդան Ղուկասյանին խորհուրդ կտամ Ռոբերտ Քոչարյանի դառը դասից դասեր քաղի։ Պետք է իրատես լինել։ Գյումրիում 50%+1 ձայներ որևէ մեկը չի հավաքելու։ Պետք չէ կոնսոլիդացիան վիժեցնող հայտարարություններ անել։ Առաջատար թեկնածուն պարտավոր է ավելի տոլերանտ լինել։ Հայաստանի քաղաքական դաշտում կույսեր չկան։ Չի կարելի ժողովրդի մեջքը կոտրել։ Մեր թեկնածուի՝ Արտյոմ Ղարաղազարյանի հետ միասին, մենք հաղթահարելու ենք անցողիկ շեմը ու ձգտելու ենք ընդդիմադիր կոնսոլիդացիայի։ Հայտարարում եմ՝ եթե մեր պատճառով նման կոնսոլիդացիա չեղավ, ես դուրս կգամ քաղաքականությունից։ Գյումրիի ընտրությունների նպատակը դա է՝ թույլ չտալ ՔՊ-ին, Նիկոլ Փաշինյանին հաղթել։ Ես հույս ունեմ՝ ընդդիմադիր ճամբարում հատկապես վերջին 7 օրերին չեն տրվելու ներսում բաժանարար գծեր գծելու՝ Նիկոլ Փաշինյանի սցենարին։ Գյումրին կարող է դառնալ Նիկոլ Փաշինյանի քաղաքական գերեզմանափորը, եթե մենք լուրջ վերաբերվենք ընտրություններին»,- եզրափակեց Սուրեն Սուրենյանցը:
Մանրամասները՝ տեսանյութում:
