Ե՞րբ են հատվել Բուսաբանական այգու կաղնիները. պարզաբանում է տնօրինությունը
Երևանի բուսաբանական այգում կտրված 30 ծառերից մոտ 20-ը հատվել են 2024 թվականի աշնանը, իսկ մնացածը` մի քանի տարի առաջ։ Այս հայտարարությունը տարածել է այգու տնօրենությունը` արձագանքելով սոցցանցային հրապարակումներին։
«Ֆեյսբուքի» օգտատեր Էդուարդ Հայրումյանը օրերս լուսանկարներ է հրապարակել, որոնցում շուրջ 30 հատ կոճղ է երևում` 30-50 սմ տրամաչափով։
«Ներկայիս տնօրեն Ժաննա Հովակիմյանը որևէ կապ չունի ծառահատումների հետ, և նրա օրոք ոչ մի կաղնի և ոչ մի ծառ չի կտրվել։ Համաձայն ՀՀ ԳԱԱ Ա. Թախտաջյանի անվան Բուսաբանության ինստիտուտի տնօրենի հրամանի` մասնագիտական հանձնախումբը 2025թ. մարտի 17-ին Երևանի բուսաբանական այգու դենդրոհավաքածուների հողամասում իրականացրել է կաղնու ծառուղու դիտարկում, ուսումնասիրություն։ Արդյունքում պարզվել է, որ ծառուղու երկարությամբ շուրջ 30 հատ կոճղ կա»,- ասված է հաղորդագրությունում։
Նշվում է, որ նույնիսկ ակնադիտական եղանակով դիտարկելիս ակնհայտ է` մեկ տասնյակից ավելի կոճղերն ունեն մի քանի տարվա հատման վաղեմություն։ Բուսաբանական այգուց վստահեցնում են` մոտ 20 հատ ծառ հատվել է 2024 թ. աշնանը։
Հատված կաղնու ծառերի կենսունակության աստիճանի որոշումը պահանջում է համալիր դենդրոչափական ուսումնասիրություն։
Հիշեցնենք, որ Ժաննա Հովակիմյանը 2025 թվականի հունվարին է նշանակվել Բուսաբանական այգու տնօրեն։ Նրանից առաջ տնօրենի պարտականությունները կատարում էր Աննա Ղուկասյանը, որը փոխարինել էր նախկին տնօրեն Արսեն Գասպարյանին։
